Wednesday, August 23, 2006

Sugilanon Ni Tita Linda

Ni Tita Linda Belayro

Isla Verde
"Ako si Alim", ro anang pakilaea. "Taga Isla Verde ako, iya ako nagbahoe. Suno sa mga katigueangan, paraiso kuno ro among isla," pahayag ni Alim.
Bugana sa tunang manggad ro among isla. Malimpyo rong hangin nga amon nga guina guinhawa. Kon agahon nagapamueot kami it mga itlog it pawikan ag mga pueos-anon para sa pamahaw. Bugana rong prutas, mga tinoean-on ag pilang mga hayop ag manok.
Kon gabi-I ag mahayag rong buean, rong mga kabinataan ag kadaeagahan hay nagapamasyar sa baybayon. Paborito nga hampang it mga onga rong pagkarera sa mga eumba-eumba o kundi magsakay sa likod it mga mahugop nga hayop sa dagat.
Isaeang adlaw, hakibot kaming mga taga isla kat may dumungka nga isaeang ka mabahoe nga barko. Sakay rong mga maputi it panit ag mataas nga mga tawo. Nakipag amigo sanda. Guin taw-an nanda it mga aeak, sigarilyo ag mga de lata ro among mga kaeaeakihan. Mga alahas, pahumot ag panapton para man sa mga kababayenhan. Guin taw-an man nanda kami it kendi ag tsokolate.
Maghalin kato, perming may kasadyahan sa among isla. Owa eon nagaadto sa trabaho rong mga kaeaeakihan tongod perming hilong sanda. Amat-amat mang nauubos rong mga perlas, manlot ag mga korales sa among dagat. Nagkuli rong mga isda ag mga pawikan bangud perming guina dakop ag i-sumsuman.
Sa mabuhay nga pagtener kong barko sa baybayon, abo man nga basura rong nagkalhit sa dagat. Ag kat owa eon it mabaylo rong mga taga barko o na ubos eon ro andang baeon, nagpanaw eon lang sanda ag inaywan ro among isla. Tag dating masadya, nag masubo, ag ma mingaw.
Naka maeasmas rong mga taga isla. Guintipon kami ko among pinaka puno. Nagumpisa it pagpanglimpyo ro mga kaeaeakihan. Nagbulig man rong mga kababayenhan sa pageaha it pagkaon sa mga naga trabaho. Nagbulig man kaming mga kabataan sa paghakot ko mga basura.
Nagtaliwan ro mga binuean. Napan-uhan namon nga amat-amat eon nga nagbalik ro mga isda ag mga pawikan. Nagbalik man sa kada trabaho ro mga kaeaeakihan. Nagbalik rong kalinong ag kasadya. Buhi eon man rong Isla Verde. /MP mailto:madyaas_pen@yahoo.com

No comments: