Pegasus–Ro Kabayo Nga May Pak-pak
Tag buhi pa si Alexander the Great, may paborito imaw nga kabayong si Bucephalus. Abo nga giyera rong guin ibahan nandang daywa. Abo man nga kadaeag-an rong guin tao kana ni Bucephalus. Rong kabayo ngara hay regalo ko anang ama. Sa edad nga 33, namatay si Alexander the Great, rong pinaka puerteng kumander ko anang tiempo. Sa pagkamatay ni Alexander, naduea man rondayang kabayo. Nangin maila sa mga tawo ag owa it bisan sin-o man ro makasakay.
Si Bucephalus hay nagbalik idto sa anang kaharian ag nag-asawa sa isaea mang ka kabayo. Nagtiyò sanda it isaeang ka kabayo nga may pakpak ag may kinaadman nga kon sin-o ro makasakay o makamanso kana, imaw ro paga kilaeahon nga amo.
Sayod si Bucephalus kong pangabuhi ona sa Roma. Abong guina maltratar. Abo pang guina gutom. Eapna-agan rong panakaw tongod sa kapigaduhon. Bu-ot nana nga makabulig sa ibang nga paagi.
Pagkatao ni Pegasus, guin hambaean imaw ko anang amang si Bucephalus nga magserbisyo sa mga naga kinahangean it bulig. Nag-eopad imaw padueong sa Crete ag idto nakilaea nana ro isaeang ka binatilyo nga paki. Pobre ro pamilya it binatilyo nga si Remus. Isaeang ka mangingisda ro anang ama. Ro anang ina hay nagalabada sa mga pamilyang manggaranon.
Abong panakawan it baka runa sa lugar nanday Remus. Rayang mga manakaw hay nagapana-og sa datag halin sa bukid ag guina takaw rong mga hayop, ag kutob sa anong mga igdaeapat nga makwartahan.
Guin takawan man sanday Remus. Guin hakot rong mga eambat ko anang ama. Nagsukoe ro anang ama agod bawi-on ro mga eambat, apang napatay imaw. Nakita ni Remus rong tanan. Owa imaw maka hueag sa anang guina tindugan.
"Kon makatikang eang kunta ako ag may masakyan", hambae sa kaugalingon ni Remus. Sa anang kaakig, nakaabot imaw hasta sa kagueangan ag tongod sa ka ga-uy, nahakatoeogan imaw. Nagdamgo imaw nga may isaeang ka kabayo, puti ag may pakpak nga nagpakita kana. Pagbugtaw nana, nakita nana una ro isaeang ka puti nga kabayo nga may pakpak nga naga hangeab. Guin eapitan nana rong kabayo ag guin hameos ro anang ueo. Guin sakyan nana rong kabayo, ag golping nag guwa rong pakpak agud maka-eopad.
Halin kato, permi sandang nagakita una sa kagueangan…May mga prutas ag tinoean-on nga daea rong kabayo para kay Remus. Anang gina uli sa andang baeay. Guina eaha man ko anang ina ro mga daeang pagka-on ko kabayo. Nagbakod si Remus sa anang pagkina on it prutas ag tinoean on.
Isaeang adlaw, nag-adto sanda ko kabayo sa banwa. Abò nga mga preso sa plasa. Guina patuman ro silot. Gina utdan sanda it ueo tongod owa naga bayad it buhis.
Naeo-oy si Remus. Mapintas guid rong bag-ong hari ag makaeo-eo-oy ro mga tawo. May nagpakita nga isaeang ka espada. Nagakinang–kinang kon tama-an it silak. Mingko may naga hutik kay Remus nga buytan rong espada. Nagsakay dayon imaw kay Pegasus ag dayon eompad sanda. Guin pang-tigpas nana rong mga soldado.
Ro tanan nga opisyales it kaharian hay nagdaea-eagan. Nagpasaeamat rong mga tawo. Guin pangtaw-an pa sanda it kwarta agud makabakae it pagkaon.
Halin kato, guinkilaea nga baganihan si Remus. Nagtuhaw rong kalinong sa kaharian. Nag-asawa imaw it isaeang ka mabuot nga babaye ag may onga sanda nga nangin kahampang ni Pegasus.
Sa mabuhay nga pagpanerbisyo ni Pegasus, nagea-ong imaw kay Remus nga mauli sa kaharian it mga kabayo. Tapos eon ro anang misyon. Agud indi imaw malipatan it mga tawo, guin obrahan nanda it monumento si Pegasus. Kon siin ag hin uno eon man magpakita si Pegasus, ro tiempo eamang ro makasayod. Sa makaron, rondayang lugar nga may monumento hay guin hingaeanan nga Pegasus City. /MP mailto:madyaas_pen@yahoo.com
No comments:
Post a Comment