Sugilanon Ni Tita Linda

Ni Tita Linda Belayro

Piyesta It Minatay

Nobyembre Uno, piyesta it minatay ogling ro buhi ro naga selebrar. Sari-saring gimik ro guina obra sa sementeryo. May naga baligya, naga konsert, naga sugae ag naga piyesta man ro mga pick-pockets. Haeos indi eon masayran kon guina dumdom pa ro nagtaliwan nga mga igbata bangud matsa isaeang ka karnabal o tindahan eon ro sementeryo.

Kon rong mga inaywan hay guina paabot ro piyesta it mga minatay, mas guina paabot man ra it mga kaeag tongod sa adlaw ngara hay guina buksan kanda ro puertahan agod makabisita sanda sa andang pamilya. Agahon pa hay naga preparar eon ro mga kaeag agod pagbukas it puertahan, mauna sanda panaog sa eogta.

Kada isaea anay kanda hay maagi sa andang eobnganan. Malipayon sanda kon makit-an nga puno it kandila ag bueak ro andang puntod. Masubo man ro iba bangod owa eot-a runa ro andang nitso o eobnganan ag ro iba hay owa guid it kandila o bueak man lang.

May mga pilyong kaeag nga ka’t sanda pa ra hay buhi, mahilig gid sanda sa mga beer house o diskuhan. Ro iba man hay hilig magpamasyar sa mga plaza, sa sinehan o sa sugaean. Busa, idto man sanda umadto. Tongod sa kasadya, owa nanda hapan-uhi nga nagbagting eon ro eangit agod magbalik eon tanan ro mga kaeag. Dali-dali ro iba it balik ogaling ratong nawili sa pagpinamasyar, nasadhan it puertahan. Maskin alinon nanda it pinanuktok hay owa guid sanda pagbuksi, busa iya eonlang sanda nag linibot ag maghueat eon man it masunod nga dag-on agod makabalik kon magbukas eon man ro puertahan. Sa nagtaliwang celebracion it piyesta minatay, preparado baea kita sa pagdumdum kanda? Owa baea sanda magtaeang ko andang pagbisita katon? Ano ro paborito nanda nga pagkaon? May naabtan baea sanda?

Kon para kakon, bukon it sa preparasyon nakasandig ro selebrasyon, ro pagdumdum sa adlaw it mga kaeag. Ka’t buhi pa sanda ag habatyagan nanda ro atong pagpalangga hay indi nanda ron malipatan. Ag kon ikaw man hay nakahimo it kamaeayran sa imong isig katawo, naka ukit man ron sa tagipusuon nanda nga indi malipatan maskin nag-taliwan eon sanda. /MP