Sugilanon Ni Tita Linda

Tita Linda BELAYRO

Ro Mapintas Nga Datu

Sa lugar it katimugan it Pilipinas, may isaeang ka Datu nga imbis magsunod kana ro mga tawo bangod sa kabuot, napilitan sanda nga magsunod tongod sa kahadluk. Ro kutob abi maakigan it Datu hay gina pa pugutan it oeo. Masyadong mata-as ro buhis nga guina pa bayran ko Datu sa mga tawo. Bangod sa kata-ason, indi haeos masarangan it pagbayad ko mga tawo. Ro Datu hay may onga nga prinsesa ag mabuot, imaw hay naeo-oy sa mga tawo, ogaling owa imaw it mahimo.

Isaea sa owa makabayad it buhis hay ro tatay ko nobyo it prinsesa. Guin hinyo ko nobyo nga imaw eon lang ro presuhon imbis nga ro anang amang magueang eon ag maeoya pa. Guin taw-an pa guihapon it plasos ro binata nga makabayad, ogaling pigado guid ro pamilya, busa guin taeana ko datu ro adlaw ko pagpugot it oeo. Ko gabi-e ngaron, naghinyo ro prinsesa sa guardiya nga makabisita sa binata. Guin idiyahan it prinsesa nga makatakas ro binata sa likod it presuhan. Parabil magpanaw ro binata, guin taw-an nana it ibang eambong ro binata ag ro anang eambong hay anang inaywan sa prinsesa. Nag-ilis ro prinsesa sa kasilyas ag guin kalbo ro anang oeo. Nagsueod dayon imaw sa kwarto ko binata ag nagpabukot it haboe.

Pagkaaga, guin takeoban imaw it sako ko prinsesa sa pagpati nga imaw ratong binata. Guin daea imaw sa plaza, sa abo nga mga tawo. Isaea eon ro guinikanan ko binata. Pagkatapos it pagpugot, hakilaea nga ro prinsesa gali ratong guin pugutan bangod sa anang singsing ag kulentas nga suksok ag ro mahaba nga buhok nga anang guin sueod sa bue-sa. Duro ro pag no-oe ko Datu. Sa sobra nga kasubo, namatay man ro reyna.

Halin kato, ro Datu hay nagbag-o eon. Owa mabuhayi, nakaasawa imaw it bata nga Reyna. Naka onga sanda it isaeang ka babaye nga haeos kahitsura ko namatay nga prinsesa. Mabuot rayang prinsesa ag palangga guid ko mga tawo. Pagkamatay ko Datu, imaw ro nagdumaea it kaharian. Guin patihan nga mayad magbuyot it maskin anong armas rayang reyna. Nahadluk ro ibang ka tribu nga eopigon rayang daeaga. Guin patihan man nga imaw ra hay halin sa linahe ni Prinsesa Urduja ro reyna it Pangasinan nga namatay nga owa nakaasawa bangod may anang pana-ad nga maga asawa eamang imaw kon may makapierde kana maskin anong klaseng pakikipag-away. /MP