Sugilanon Ni Tita Linda

Ni Tita Linda Belayro

Ro Higanteng Si Kurubu-an

Guina kahadlukan it mga tawo ro mga higante tongod sa anang kataason, kabahoe ag kahaba it bungot. My una man nga higante abi nga naga panga-on it tawo. May una mat-a nga mabu-ot ag maatag nga higante.

Isaea eon kara si Kurubu-an, sangka higante nga indi basta-basta mamatay tongod ro anang kabuhi ag pagginhawa hay idto sa nagabuka nga bukid ag nagakipo man kon imaw mag ginhawa.

Nangin mabahoe nga bulig si Kurubu-an sa mga tawo. Imaw ra ro taga bantay it mga tawo ko andang mga hayop, pananum kontra sa mga pirata nga naga abot kanda kon oras it tag-gutom. Imaw man ro naga arado ag naga pangisda para sa mga tawo. Busa, maeomo ro pagpangabuhi ko mga tawo tongod sa bulig ni Kurubu-an. Abo nga mga maeahaeon nga bato ro guina tago sa baeay ni Kurubuan. Raya ro guina pabantayan kana it mga engkantada it kagueangan. Kon mabuhinan raya ag anang duea-on, maga bayad imaw ko anang kabuhi. Ogaling indi basta-basta imaw mamatay, idto guintago ro anang pagginhawa sa daywang ka bukid.

Umabot ro oras nga nangin mauswagon ro mga tawo ogaling bukon pa it kuntento sanda. Bu-ot pa gid nga sudlon ro pamaeay ni Kurubuan agod takawon ro mga perlas ag bueawan. Ko mga oras ngaron hay naga katoeog eon ro higante. Habugtaw ro higante tongod may nahumgan imaw nga tawo. Pagkapan-o ko mga tawo nga nagbugtaw ro higante, guin eabo ag guin pana imaw ko mga tawo ogaling owa guid imaw mamatay.

Nagdaeagan ro higante nga daea nana ro tibud nga may alahas. Umadto imaw sa bukid nga anang guin hawa. Guin eotos man imaw ko mga tawo. Pagkakita nana sa mga tawo, eombog imaw sa daywang ka bukid nga naga buka-buka. Owa napan-uhi ko mga tawo ro naga buka nga bukid. Pagbuka it uman, owa naka pamuyot ro mga tawo. Deretso sanda sa idaeum it bukid nga nagkaea piglit hasta namatay. Guin punggan dayon ni Kurubuan ro anang pagginhawa hasta makasaka imaw it uman sa ibabaw. Duro guid ro anang kasubo sa guinhimo kanang pag traidor ko mga tawo.

Halin kato, owa eot-a nagabulig si Kurubuan sa mga tawo. Owa man imaw naga pakita. Kon namatay imaw, owa nanda masayuri, ogaling ro bukid nga nagabuka-buka kon magginhawa ro higante hay una pa ogaling owa eot-a nagahueag.

Ro mga taga runa sa lugar ngaron hay nakakita it masilaw nga bagay kon gabi-i sa ibabaw it bukid kon mahayag ro buean. Guina patihan nga basi rato ro tibud nga puno it bueawan nga guina bantayan it higante. Pagka-agahon, owa man sanda it makita maskin anong kutkot ro obrahon. Sa kabuhayon ag kaeapad ko pag kinut-kot, natimpa ro bukid ag mabaskog nga landslide ro natabo.

Abong kabaeayan, kabuhi ag mga pagkabutang ro naduea. Raya ro bunga ko pagiging sueok ko mga tawo. Bukon it kontento sa kasarangan nga manggad, bu-ot pa guihapon nga dugangan busa, imaw ra ro natabo. Bu-ot man baea naton nga mawraya man ro matabo katon? /MP