Sugilanon Ni Tita Linda

Ni Tita Linda Belayro

Perfedia
(Malibunog Ro Kalibutan)

Tongod sa pag binaktas, upod eon ro sapatos ni Perfidia agod mag-apply it trabaho ogaling tanan “No Vacancy” ro anang guin applayan. Sin-o man abi kana ro magbaton? Owa it eabot nga maitom eon imaw hay kulot pa ro anang buhok ag madamoe ro anang kilay. Ogaling mataas man imaw ag matangos ro anang ilong nga hamana sa anang amang Negro.

Naga trabaho si Bradley sa Clark Field sa Pampanga, isaeang ka soldado it U.S. Navy ka’t magkilaea sanda ni Isabel. Manog bo-oe ag manog hatod it labada si Isabel sa baeay it isaeang ka mataas nga opisyal it mga kano. Nag-iba sanda, busa nag nabdos si Isabel. Nag uli imaw sa probinsya nana agod idto mag-onga. Parabil mag-balik it Amerika ro mga kano, guin osoy pa ni Bradley ro mag-ina, ogaling golpehan ro paghalin it mga kano. Ro solong haaywan kay Isabel hay pulseras ag kulentas nga may sueod nga litrato ni Bradley sa locket.

Sa kagutom ag kaakig ni Perfedia, bu-ot nanang i-prenda ro pulseras, ogaling indi nana malipatan ro bilin ni Nanay na nga maskin mag-inalin, indi guid igbaligya o duea-on ro pulseras ag kulentas tongod rekara naka tumoy ro anang kabuhi. Guin baktas nana ro karsadahon hasta nakaabot imaw sa isaeang ka kanto. My hakita imaw nga karatula, “Wanted Yaya”. Nag-prisentar imaw.

“Its you that I am looking for. Please come with me to the States. Your father had been looking for you”, hambae it negro kay Perfedia. Guindaea ni Perfedia ro negro sa anda agod ibalita kay Nanay na ro katuyu-an ko Negro. Matsa indi makapati si Isabel. Naga duda pa imaw basi kon peke rayang Negro ag lokohon eamang sanda. Para magpati, nagbalik sanda sa baeay ko amo ni Perfedia. Nagpamatuod ro amo nga amigo nana si Bradley. May masakit imaw nga kanser ag parabil mamatay, bu-ot nana nga makita ro anang mag-ina. Kadali guid lang ro paglakad ko andang papeles pareho it passport ag US visa. sa bulig ko anang amo. Sa mapig-ud nga hambae, nag adto sanda sa Estados Unidos.

Pag-abot sa State, nagkita ro mag-ama. Una man ro ibang mga onga nga negra ogaling patay eon ro andang ina. Baeo gali si Bradley. Guin basa ro testamento ko abogado ag owa man it reklamo ro anang mga igmanghod. Negtener sandang mag-ina sa America agod ipamasyar si Perfedia sa andang ibang igbata.

Pag-oli sa Pilipinas, eain nga Perfedia eon ro makita. Malibunog guid matuod ro kalibutan./MP