Sugilanon Ni Tita Linda

Tita Linda Belayro

Ukò

Ko una nga mga tyempo, ka’t owa pa mag abot ro mga moderno nga teknolohiya, ro atong nasyong Pilipinas hay may mga tinuga nga naga kabuhi nga kapareho man naton. Ogaling may mga kinaadman sanda nga guina huptan nga indi pa matupungan it ordinaryong tawo.

May guina suguid ro mga katigueangan hanungod sa Ukò, isaeang ka tinuga nga ro oeo hay matsa pispis ogaling may daywang ka siki nga ro mga tudlo hay kapareho it bebe. Sanda ra hay ma-ilaon mag estar maeapit sa bi-bi it suba. Indi ra sanda makita ogaling kon gustohon nanda nga magpakita hay sa mga tawo nga nagustuhan nanda.

Isaeang adlaw, masako gid nga naga linaba ro mga kaabayen-an. Ro isaeang ka daeagang si Maring ro guin kursunadahan ko Ukò. Nagpaeapit imaw sa daeaga samtang naga-buead it linabahan sa may batuhan agod magkula. Nakabati si Maring it sit-sit. Pag ea-um nana hay ro mga kaibahan nana ro nagasit-sit, ogaling pag-balikid nana hay ro Ukò ro anang hakita. Suminggit imaw nga kina kibot ko ibang naga eaba.

“Gusto eamang akong makipag amigo kimo”, hambae it Ukò. Owa maka hueag si Maring sa kahadluk. Guin paeapitan imaw ko mga kaibahan, ogaling owa sanda it hakita. Nagpauli eon haeos tanan ro mga kababa-yenhan, ogaling nabilin pa guihapon si Maring. Guinpauli-ulian imaw it Ukò nga nagus-tuhan nana ro daeaga bangod sa anang kabuot ag kahugod.

Halin kato, ona pirme ro Ukò naga bantay sa daeaga. Sayod man imaw ko problema ko daeaga. Nagmasakit ro anang ina. Guin taw-an imaw it dahon agud imnon. Matapos mainom ro guin eaga nga dahon, nagmayad ro anang ina. Nangin iba ro panan-aw ko ibang tawo. Nag-kaumang kuno ro daeaga ag naga hinambae nga owa it kahambae. Ro nobyo ni Maring hay nag-iba man ro anang baeatyagon busa naga tingangis ro daeaga.

Sa kalisod it daeaga hay nagmasakit man ro Ukò. Naeo-oy ro daeaga busa guin tatap nana ro Ukò. Bangod sa kabuot ni Maring, nagmayad ro Ukò ag guin pakitaan nana ro nobyo ni Maring. Guin hun-an nana nga kon lokohon ro daeaga hay may matabo kana. Hinadlukan ro eaeaki ag nagsumpa nga higugma-on nana ro daeaga. Owa magbuhay, nag kasugot nga mag pakasae sanda.

Sa oras it kasae ko daywa, mabaskog ro oean. Eoha kuno ko Ukò ro naga tugpa, sinanday Maring ag ko anang ina. Pagkatapos ko oean, may hakita nga poyo sa guina eodhan nanday Maring. Sa anang pagbukad, tumambad ro mga batong bueawan. Nangin isyu ratong poyo. Sa pagpati it mga tawo, regalo kay Maring ko owa makilaeang taga hanga. Sayod ni Maring kon siin maghalin ro puyo. /MP