Sugilanon Ni Tita Linda

Ni Tita Linda Belayro

Guinsumpa Nga Eamang

Eain-eain nga mga klase ro eamang sa aton nga palibot. May mga tawong naga kolekta kara ag guina baligya it mahae kon tumaeagsahon nga klase nga eamang. May una man nga guina obrang sugae, guina paaway ro mga eamang ag guina pustaan.

Sa barangay it Masantol, may isaeang ka magueang nga naga usoy it eamang. Ro anang gusto hay puro puea ro kolor ag magilak. Rondayang magueang hay isaeang ka bruha ag guina usoy nana rondayang klase nga eamang. Haum imaw magbayad maskin pilang pesos ro pagbaligya.

May isaeang ka prinsipe nga guin sumpa ko magueang nga bruha busa, nahimong eamang tongod owa pagpakasli ko prinsipe ro anang onga nga daeaga. Bu-ot ko magueang nga bruha nga indi makabalik sa dating dagway ro prinsipe busa, kon anang makita rondayang eamang hay anang paga patyon. Maduea ro sumpa ko magueang nga bruha kon may isaeang ka babaye nga putli ro maka dakop ag magatatap sa rayang eamang. Dugang pa, maga balik dayon ro prinsipe sa anang dating dagway.

Isaeang adlaw, samtang naga pamunyag ko anang hardin, may hakita si Ella nga mabahoe nga eamang sa mga tanum. Bali ro siki ag guina libutan ro eamang it mga tagasaw agod kan-on. Naeo-oy si Ella sa eamang busa, anang guin dakop, guin daea sa andang baeay agod boe-ngon. Ana pa nga guin patoeog sa mahumok nga tela ro eamang.

Pagkaaga, owa eot-a ro eamang, naduea imaw. Sa owa magbuhay, may nag patagbaeay. Pagbukas it puetahan, isaeang ka magueang nga nauhaw, naga pangayo it tubi. Guin taw-an it tubi ni Ella ro magueang. Ogaling sa kaeoya ko magueang, natumba ra sa saeog. Guin tatap ni Ella, ag guin pakaon it linugaw. Pagbuyot sa li-og it magueang, mataas ro eagnat. Busa, ana nga guin trapuhan. Pagkatapos, tongod sa anang kaga-oy, hakatoeogan si Ella. Hamuok si Ella hasta pagkaaga. Owa eon ro magueang. Ogaling owa man kapilahi hay may nag patagbaeay nga isaeang ka gwapuhon nga eaeaki. Owa it iba kundi si Prinsipe Rodrigo imaw.

Imaw rato ro eamang nga guin tatap ni Ella. Nagpasaeamat ro Prinsipe kay Ella. Anang guin daea si Ella sa kaharian it Prinsipe. Guin pakilaea imaw sa anang Amang Hari ag sa owa magbuhay, guin pakasae sanda. Owa eon it mahimo ratong bruha tongod habungkag eon ro anang sumpa. /MP