Sugilanon Ni Tita Linda

Tita Linda Belayro

EOMAY

Nagapati baea kamo sa eomay? Kon may una nga nagapati kara, may una mat-a nga owa nagapati.

Sa mag-asawang Pater ag Selda, abo nga naga hambae nga guin gamitan kuno it gayuma si Selda agod magsugot nga magpakasae kay Pater. Masyado abing maeaw-ay si Pater ipabanuead sa ibang mga eaeaki nga may itsura. Mga manggaranon pa sanda nga dungan nga naga pangasawa kay Selda.

May amigong ermitanyo si Pater. Kada adlaw nga Biyernes kon magpanaog sa datag rayang ermitanyo hay naga hapit anay kay Pater agod magpamahaw. Mabuhay eon sanda nga mag kakilaea busa, guina suguid ni Pater ro anang mga problema sa ermitanyo.

Isaeang adlaw nga Biyernes, sa anang pagsaylo sa poetahan it baeay, haabutan it ermitanyo nga masubo si Pater. Nasayuran man nana nga owa hikatoeogi si Pater tongod owa imaw maka tiyempo nga maka atubang ag maka suguilanon sa daeaga. Abo abi man nga mga binata nga nakadungan sa anang pag pamasyar. Tongod kara, masubo gid imaw nga umuli ag owa hakatoeogi ko gabi-i ngaron.

Guin taw-an imaw it medalyon ko ermitanyo nga suno kana hay may eomay sa naga suksok kara. Ogaling, kinahangean nga eakipan pa gid nana it pangamuyo ag pagsalig sa kaugalingon, pagpakita it pagka mainubuson ag paghugod, eakip man ro pagka matinahuron.

Malipayon nga guin suksok ni Pater ro medalyon. Bu-ot eon nanang mangin hapon eon agod maka bisita kay Selda. Ko hapon ngaron, nagbisita eon imaw sa baeay ni Selda. Tongod may mga hauna pa kana, nagpasyar-pasyar anay imaw sa palibot. Sa anang pagtikang-tikang, hakita nana ro tatay ni Selda nga naga obra. Nag bulig imaw. Umabot man dayon ro ina ni Selda nga halin sa tindahan ag guin buligan nana it hakot ro nanay sa anang dinaea. Maanga-angan, naga hangos ag naga sininggit ro manghod ni Selda nga nahueog sa suba ro andang kamanghuran. Dali-dali nga nagdaeagan si Pater agod tabangon ro naga pangoy-pangoy nga onga. Owa guid it naka obra kara sa mga naga pangasawa kay Selda kundi si Pater eamang.

Tumaliwan ro sang buean, hakibot si Pater tag guin patawag imaw ko ama ni Selda. Bu-ot nana nga ipakasae eon ro anang daeaga kay Pater. Mabudlay makapati si Pater. Indi man makapati ro mga kaeapit-baeay nanday Selda matapos mabati-an nanda ro bu-ot mahuman ko ginikanan ni Selda.

Sanda ro nag pabantog nga guin gamitan it eomay ni Pater si Selda. Suno kay Pater, epekto raya ko anang medalyon nga guin ta-o it ermitanyo. Guin kasae sa owa magbuhay si Pater ag si Selda. Pag-abot it adlaw nga Biyernes, pagbisita it ermitanyo, abo guid ro anang pagpasaeamat sa ermitanyo.

Naghambae dayon ro ermitanyo nga owa it gayuma ro medalyon. Kon ham-an it guin baton si Pater ni Selda hay tongod ha eomay imaw ko mayad nga pamatasan nga guin pakita ni Pater nga owa makita sa ibang binata. Guin obra rondaya ko ermitanyo agod magbalik ro pag-eaom ni Pater.

Busa, ro mayad nga pamatasan nga guin pakita ni Pater sa ginikanan ni Selda hay sobra pang eomay nga owa guina tan-aw sa hitsura, ag ro kanabaw it boesa. Makaron, malipayon eon sanda nga naga kabuhi kaibahan ko andang daywang ka mga onga nga tanan but-anan. /MP