Planetang Xerxus
Manggaranon ro planetang Xerxus. Bugana ro mga tawo sa cuarta, pagkaon, ag naga estar sa mga maeagko nga baeay, mayad-ayad ro andang pagbisti, maeagko ro mga katamnan ag abo nga mga mineral ro andang kabukiran. Malig-on ro mga inprastraktura sa palibot ag owa it pobre sa rondayang planeta.
Ogaling magueang eon rondayang planeta ag sa indi magbuhay, basi maga kueang ro andang tubi. Nag paino-ino ro reyna. Paagi sa mga bag-ong igdaeapat, may hakita sandang isaeang ka berdeng planeta. Guin paadtunan rondayang planeta nga owa it iba kundi ro atong eogta, ro planetang Earth. Hakita nanda nga bugana sa tubi ro atong eawod, kasuba-an, busay ag mga sapa. Pagbalik ko mga sakup ko reyna, guin suguid nanda ro andang hakit-an. Guin pahaum dayon ro paghigop it tubi sa mga eawod, hasta sa mga suba ag busay sa planetang Earth.
Pagbugtaw it mga tawo, hakita nanda nga namaehan ro andang baybayon. Tanan ro mga isda hay nag amat-amat it kaeamatay. Ro mga tanum hay nagkaea-ay. Ro mga hayop hay naga umang kon siin maka inum it tubi.
Nagkahadluk ro tanan. Paagi kay Dr. Armstrong nga isaeang ka sayantista, guin usoy ko anang aparato kon sin-o ro nag paatas it suba ag eawod. Idto sa ibabaw hakita ko anang aparato ro mabahoe nga saeakyang pang hangin ro sige nga naga halin it tubi paadto sa planetang Xerxus. Naghueag si Dr. Armstrong. Guin buhusan nana it acido ro tubi nga kutob guina higop. Owa naka sayod ro mga Xerxian sa plano ni Dr. Armstrong. Paggamit ko mga Xerxian sa tubi, hangawa sanda nga nagkatoe ro andang eawas ag ro mga panit nanda hay nagkaea pae-os. Ro mga hayop hay nagkaeamatay ag nagkaea-ay man ro mga tanum nanda.
Guin papundo ko reyna ro paghigop it tubi. Kat hapan-uhan ko mga taga eogta nga nagpundo eon ro paghigop, nag-paeopad it eroplano ro gobiyerno agod magsabod it yelo pang pa-uean. Golpe nga nagpangilat ag nagpanaeog-dog. Bumuhos ro mabaskog nga uean. Naghinugyaw ro mga tawo. Nag umpisa sanda it pagtipon it tubi. Nag umpisa man it eagtum ro mga tanum. Bumalik ro kapagsik it mga kasapatan.
Samtang idto sa planetang Xerxus, abo ro nahalitan it acido. Hakita nanda kon paalin ro tawo naga boeoligan. Owa eon it naga tinapas it kahoy, naga pilak it basura sa kasubaan ag naga kinot it pagdapat it tubi. Raya ro kabangdanan kon ham-an it guina tawag nga berdeng planeta ro atong eogta.
Tongod sa pagkasayod ko mga Xerxian ko sekreto it mga taga eogta, guin tuead man nanda ro atong guina himo. Kon hin-uno magbalik ag mag-mayad ro kasamaran it planetang Xerxus, sanda eamang ro nakasayod. /MP
No comments:
Post a Comment