Sugilanon Ni Tita Linda

Tita Linda Belayro

Prinsesa It Mga Sawa

Bata pa si Perlina hay maila-on eon imaw mag pamantaw it mga sawa. Nag umpisa raya ko gabii ngato kat habugtawan ko anang ina ro isaeang ka maisot nga sawa nga naga eokon sa kilid ko anang onga nga naga katoeog. Bu-ot kunta nga patyon ko anang ina ro sawa ogaling habugtaw ag nagtangis ro eapsag. Ro tangis hay limog it matsa naga pakitlo-oy nga indi pag sakiton ro sawa. Umpisa kato, nangin ordinaryo eon lang nga taean-awon sa baeay ni Perlina ro mga sawa.

Isaeang adlaw, may matsa naga toeod kay Perlina nga mag adto imaw sa kagueangan. Nagpanaw man gid ngani imaw. Nag sueonod kana ro kahampang nga mga sawa. Pag-abot sa tunga it kagueangan, may nag-pakita kana nga isaeang ka mabahoe man nga sawa. Golpe nga nagbaylo ro anang dagway ag nangin tawo. Hakibot si Perlina. Nagpakilaea imaw nga reyna it mga sawa ag naga usoy sanda it prinsesa bilang kabueos sa namatay nga prinsesa nga natum-bahan it mabahoe nga kahoy ko nagtaliwan gid lang nga bagyo.

Guin baton ni Perlina ro pagiging prinsesa it mga sawa. Guin taw-an imaw it puting bato nga may gahum ag sarang maka kambyo sa pagiging sawa kon gustuhon nana. Dugang pa karon, may ana pa nga kinaadman nga mabaton bilang taga bantay ko kagueangan.

Kon bilog ro buean, naga pamasyar sa kagueangan si Perlina agod tan-awon kon may problema ro mga sawa.

Isaeang adlaw, may nag-abot nga mga tawo sa kagueangan ag may daeang pang potoe it kahoy. May mga wasay ag eagari sanda. Sanda ra ro perming naga pamukan it mga kahoy nga owa it naga kaigong permiso halin sa gobyerno. Nag report ro mga sawa kay Perlina. Sa owa magbuhay, nag baylo ro dagway ni Perlina. Dali-dali man imaw nga nag adto sa kagueangan. Sa anang mando, tanan ro sawa sa kagueangan hay nag aeabot ag guin pang angkit ro mga tawo, samtang guin pang paeopotan ro mga igdaeapat sa pagpukan it kahoy agod indi maka hueag. Nagpinamaril ro mga tawo ogaling owa guid nanda hapatay ro mga sawa. Owa sanda it mahimo kundi nagpaeagyo ag owa eon magbalik balik.

Tag sa kagueangan si Perlina, guin usoy ko anang ina imaw. Owa man magbuhay, nag abot si Perlina. Guin suguid nana ro tanan hanungod sa anang pagkatawo. Nalipay ag nasubo ro anang ina, ogaling ko ulihi, nalipay man gid imaw tongod mabahoe ro naibulig ni Perlina sa anang isig ka-tawo. /MP