Sugilanon Ni Tita Linda

Ni Tita Linda Belayro

Kakapid Nga Ueod

Mingko indi mapatihan ro natabo kay Loreng. Nag onga abi imaw it may kakapid nga ueod ro anang onga. Owa magbuhay, namatay ro eapsag ogaling buhi mat-a ro ueod.

Owa pa it sang dag-on nga hakasae sanday Nando ag Loreng. Ko agahon ngaron, samtang naga eaba imaw sa suba, may nag agi nga eaeaki nga nagasakay sa itom nga kabayo. Guin tueok nana si Loreng ag dayon nanaog sa kabayo. 

Nagpakilaea imaw kay Loreng nga isaea kuno imaw ka negosyante sa pihak nga baryo. Pagkasayod nana nga may asawa eon si Loreng, guin taw-an imaw it prutas nga kor-te it mansanas dayon nagpanaw ro eaeaki. Pag abot sa baeay, ga-oy ag gutom si Loreng. Guin kaon nana ro prutas. Ko gabi-e ngaron, nagsakit ro tiyan ni Loreng. Ming-ko may naga kamang sa sueod ko anang tiyan. Nagtawag it paltera si Nando. Sa pagbuyot sa tiyan ni Loreng, nabatyagan ko paltera nga may kabuhi sa sueod ko tiyan ni Loreng. Ogaling naga duha-duha imaw sa anang nabatyagan. Guin taw-an nana it banyos si Loreng kon hinali magsakit ro anang tiyan. Perming guina gutom si Loreng ag abo kon kumaon, ogaling owa man imaw ga tambok. Tumaliwan ro siyam nga buean, nag unga si Loreng. Una nga nag guwa ro eapsag ogaling patay ag masyadong maniwang. Masunod nga nag guwa ro ueod nga kolor berde. May daywang ka doeonggan ag mingko alibutod it mais ro korte ag kabahoe. Busog nga mayad ro ueod. Sa kahadlok ni Nando, bu-ot nana nga patyon ro ueod ogaling nagpamalibad ro paltera ay basi kuno balikan sanda. Andang guin butang ro ueod sa garapon. Guin pakaon nanda ro ueod it gatas ogaling owa naila kondi mga insekto ro anang guina kaon. Nalisdan it usoy it mga insekto si Nando, busa mga paka ag eanggam eon ro guina kaon it ueod. Agod indi mapyestahan it mga tawo, nagpanaw sanda ag idto nag estar sa kagueangan. Madasig magbahoe ro ueod nga mat bati-is eon ro kabahoe. Sige man nga hinaba ko anang doeonggan. Nag abot ro tinguean ag abo nga mga paka ro nag gueowa. Nagpaayaw-ayaw it kaon ro ueod. Pag abot it tig sililak, umatake man ro nga apan. 

Sa bulig it ueod, nagkaeasipot ro mga apan. Amat-amat nga nag mu-ad ro katamnan ni Nando. Ogaling masubo sanda tongod owa sanda it normal nga unga. 

Isaeang adlaw, may nag abot nga eaeaki, sakay sa itom nga kabayo. Nakilaea imaw ni Loreng. Nagpakilaea pa guid nga taga ibang planeta imaw ag indi maka unga ro anang asawa busa nag usoy imaw it isaeang ka babaye nga makata-o kanda it onga. Bu-ot nana nga boe-on ro anang unga. Owa it mahimo sanday Nando maskin napamahae eon kanda ro ueod. 

Guin taw-an sanda it bato nga mga brilyante bilang kabaylo sa andang pagtatap sa ueod. Paghalin ko eaeaki, masubo guid ro mag asawa. Nagbalik sa normal ro tanan. Tumaliwan ro sang dag-on, nag unga it normal nga eapsag nga babaye ro mag asawa. Indi man nanda malipatan ro ueod tongod maskin abo ro guina ta-o kanda nga kahugmat, may kabaylo man ro tanan. Makaron, dalagita eon ro andang unga ag may hitsura, gwapa. Sa anang banwa eon sanda naga estar. /MP