Sugilanon Ni Tita Linda

Ni Tita Linda Belayro

“Diary” 

Naka Eobad  Sa Krimen

Bu-ot magsueat sa anang “diary” si Alice. Maisot pa imaw hay guin tun-an eon imaw it pagsueat ko anang ina. Hasta imaw nagbahoe, maila-on eon si Alice sa pagsueat it mga naga kahanabo sa anang kabuhi ag sa anang palibot. Owa guid it naka basa sa rondayang diary tongod nakasueod sa isaeang ka kahon nga may kandado.

Ko isaeang gabi-e ngaron, samtang naga pahangin-hangin si Alice sa andang balkon, may hakita imaw nga mga tawo sa pihak nga baeay. Naga kutkot sanda sa likod ko andang baeay ag may guin eobong pa nga sako. Guin sueat ni Alice sa anang diary ro anang hakita kaeakip ro petsa ag oras nga natabo. 

Nagtaliwan ro mga dinag-on. Nag gueang nga daeaga si Alice. Owa naka pangasawa. Owa man guid imaw nakasayod sa sangka krimen nga natabo sa andang banwa, ro pagkamatay ko andang pinuno it banwa. Owa guid maeobad ro nasambit nga krimen tongod limpyo ag planado guid it husto ro mga natabo.  

Namatay si Alice sa masakit nga kanser.  Tanan ro gina angkon ni Alice hay inaywan na pagkamatay. Isaea sa anang gumankon ro nakakita ko anang diary samtang naga panghimos sa mga inaywan nga gamit ni Alice. Guin basa nana ro diary. Habasahan nana ro petsa nga may natabo nga krimen nga may markang puea.

Guin daea ko dalagita sa anang ama ro diary. Guindaea man dayon nanda idto sa estasyon it pulis. Nabuhi ro kaso ko pagkamatay it pinuno it banwa. 

Sa sugo nga nahamtang sa “Search Warrant”, guin kutkot ro lugar suno sa guina sugid sa diary. Pagka kutkot, hakita ro eonot eon nga sako ag ro mga toe-an it tawo. 

Hapamatud-an nga ro sueod it sako hay eawas gali rato it namatay nga pinuno. Guin daea it mga pulis ro bilog nga pamilya nga tag-ana it baeay sa estasyon it pulis agod imbestigahan. Nag guwa nga ro tatay nga kasumpong sa negosyo ro nagpapatay sa pinuno. Ag para owa it makakita, idto guin eobong sa andang likod it baeay. 

Guin preso ro tatay ag tongod sa may edad eon, owa mabuhayi, nagmasakit ag namatay. Umpisa nga guin himo nana ro krimen, owa guid imaw pagpahuwaya ko anang konsensya. 

Makaron, sa alima it kapulisyahan ro diary ni Alice nga nagserbing yabi sa pag-eobad ko isaeang ka krimen, nakatao it hustisya, ag kapahuwayan sa pamilya ko biktima ag ko kriminal.  /MP