Sugilanon Ni Tita Linda

Ni Tita Linda Belayro

Nasae-an Nga Amô

Mangunguma si Castor. Maeapad ro anang katamnan ogaling tuso imaw. Owa maski sin-o ro maka pangayo kana. Maskin may samad nga prutas hay guina baligya pa nana. Owa imaw naila nga mabuhinan ro anang tanum nga prutas. Maskin ro anang mga unga hay indi maka paayaw-ayaw it kaon. Parabil sanda makasamit, kinahangean maglimpyo anay sanda ag mag panghimos it mga dahon. Imaw ron ka strikto si Castor busa nagmanggaranon imaw.

Agod indi matakaw ro anang mga tanom, guin kuraean nana it hollow blocks ro anang katamnan ag guin butangan it kandang sa ibabaw.

Isaeang adlaw, guin salakay it mga amo ro anang katamnan. Hapan-uhan ni Castor. Guin pang baril nana ro kutob makit-an nga amô. Abo nga namatay nga amô ogaling abo man ro naka paeagiw. Abo ro nabuhin sa anang mga prutas. Nagtaeana imaw it mga bantay ag relyebo sanda sa pagbantay 24 oras kada adlaw. Mabuhay eon man nga tiyempo nga owa nakabalik ro mga amô, ogaling sige pa guihapon ro mga bantay. Hakita ko anang kamanghuran nga unga nga owa eon it to-eog to-eog ro anang ama.

Sa anang kaeo-oy, sumaka imaw idto sa mataas nga kahoy maeapit sa pader agod magbantay man sa mga amô. May daea imaw nga tirador ag mga bato. Ogaling pagtapak nana sa isaeang ka sanga, nabali ratong sanga ag humapay sa pader. Hakibot ro anang ama nga maeapit eamang sa lugar ngaron. Ea-om nana hay amô ro anang unga, busa anang binaril. Nahueog ro unga una guid sa anang tungod. Mabahoe ro anang kakibot. Indi mabaton ni Castor ro natabo. 

Tongod sa sobrang kahakog nga indi mabuhinan ro anang mga prutas, kabuhi ko anang unga ro kabaylo. Halin kato, naduea ro anang kahugod nga tatapon it mayad ro anang mga tanum. Guin pabay-an nana ro katamnan.

Inataki it mga amô ro anang katamnan ogaling owa nana pagtabuga. Pagkabusog it mga amô, dayon mat-a sanda nga pumanaw. Bukon eamang it mga amô ro nabusog kundi ro mga unga ag ro mga tawo una sa lugar. 

Nakabalik sa tama nga paino-ino si Castor. Halin kato, nangin maatag eon imaw sa mga tawo. Owa eon imaw it kinahangean nga bayaran ro bantay. Mismo ro mga tawo ag anang mga unga ro naga bantay sa anang katamnan. /MP