Sugilanon Ni Tita Linda

Ni Tita Linda Belayro

Aritos Ni Aringking

Si Aringking hay isaeang ka dalagita nga Ati o Baluga. Sa tribu it mga Ati, ro mga kadaeagahan hay guina kabitan it aritos pag abot sa hamtang eon nga pagkadaeaga. Rondaya ro guina paabot ko tanan nga dalagitang kababayen-an nga Ati.

Kon may naga kabit nga aritos sa mga kadaeagahan, naga kahueogan nga daeaga eon sanda ag sarang eon pangasaw-on. Ro mga unga it pinuno hay saway o bueawan ro guinakabit sa andang doeonggan. Sa mga pobre hay mga human sa oway o kundi nito nga aritos. 

Pag abot ko kaadlawan ni Aringking, guin kangay nana ro tanan nga barkada. Bu-ot nana nga andang masaksihan ro pagkabit kana it aritos. Bugana ro pahaum ko anang ama nga imaw ro pinaka puno ko andang tribu. May guina sunod nga protocol ro mga Ati sa pagkabit it aritos. 

Sa oras it pagkabit it aritos kay Aringking, hakita ko tanan nga nahuman sa saway ro aritos ni Aringking. Rondayang aritos hay guin tao kana ko anang ina nga namana man sa anang ina. Kon mag asawa abi ro isaeang ka daeagang Ati hay guina hukas nanda ro aritos ag tagu-on tongod naga trabaho sanda. Malipayon guid ko mga oras ngaron si Aringking.

Pagkaaga, nagsaeampitan nga maligos ro anang mga kaibahan sa suba. Nagmunot man si Aringking. Sa sige nana nga pagpinaligos, owa nana napan-uhi nga sang lingit eon lang gali ro anang aritos. Ro anang barkada pa ro naka pan-o nga sang lingit eon lang ro anang aritos. Guin usoy ko anang kaibahan ro aritos ogaling owa guid nanda hakita. Nagtinangis si Aringking nga nag uli. Pag abot sa baeay, abo guid ro kaakig ko anang ama ag ina. 

Nagpabando ro anang ama nga kon sin-o ro makakita ko aritos hay imaw ro mangin asawa ni Aringking, ogaling owa guid it nakakita sa aritos. Nagpabilin nga sang lingit ro guina suksok nga aritos ni Aringking. Naggueang imaw nga owa guid nakaasawa, ogaling isaeang ka leksyon ro anang natun-an nga dapat tatapon ag hipigan ro mga mahayga nga butang. /MP