Sugilanon Ni Tita Linda

Ni Tita Linda Belayro

Saeampati Ni Mukong

May mga hayopang manok si Mukong. Samtang naga sabod si Mukong it mga manok ko agahon ngaron, may isaeang ka saeampating puti ro tumugpa. Nakituka imaw it mga paeay, sabod. May nakahigot nga sueat sa anang siki: “tatapa ako, saeamat” X. Rondaya ro nakasueat sa papel nga habasa ni Mukong. 

Guintatap ni Mukong ro pispis ag guin obrahan it baeay-baeay agod indi maangkit it mga hayop. Kada agahon, may itlog nga guina ta-o ro saeampati ag may sueat pirming, kon basahon: “saeamat X”.

Isaeang adlaw, nagmasakit it trangkaso si Mukong. Una sa anang eoyo naga bantay ro saeampati. Nag eopad ro saeampati. Uwa man magbuhay ag nagbalik. Sa anang pagbalik, may mga dahon nga daea ro pispis. May sueat man kon ano ro obrahon sa mga dahon. Nagmayad si Mukong. Nagbalik sa pag alila ko anang mga hayop. Ko isaeang agahon, hapan-ohan ni Mukong nga owa it saeampati nga nagtugpa agod magtuka it mga sabod. Guin usoy ni Mukong ro pispis, hasta nagdueom. Owa guid mag abot ro pispis. Owa man nana makita. 

Tumaliwan ro pilang adlaw, umabot ro saeampati, ogaling dugo-an ag may nina ro anang abaga. Guin boeong ni Mukong ro pispis ag guin bantayan sa pagkatoeog. Tongod sa sunod-sunod nga pagpueaw abo gid ro anang kadueoygon sa pilang adlaw nga pagtinatap sa pispis, hakatoeogan si Mukong.

Sa anang pagkatoeog habugtawan man nana ro isaeang ka babaye nga nakaputi ro tumambad kana. Guin usoy nana ro pispis. Uwa nana hikita. Guin pakita ko babaye ro mga sueat nga may mga markang “saeamat X”. Imaw gali ratong saeampati. Guin baylo imaw nga saeampati ko maimon nga duwende nga naila kana. Owa naila imaw sa duwende busa, guin baylo imaw nga pispis. Mabalik eamang imaw sa dating dagway kon may eaeaki nga magabulig kana. 

Ro saeampati hay sangka prinsesa gali. Sa pagbalik sa normal nga dagway ni Prinsesa Andaya, nagpasaeamat imaw kay Mukong. Masubo gid si Mukong ogaling nabaylohan it kalipay ay imaw hay nakabulig man sa prinsesa. 

Tumaliwan ro pilang buean, may nagpundo nga itom nga awto sa ogsaran ko baeay ni Mukong. May mga bantay nga nagpanaog sa saeakyan. Sumunod gumuwa man dayon ro prinsesa. Guindaea it prinsesa si Mukong idto sa kaharian. Guin pa aywan kana ro anang baeay ag kasapatan sa anang kahilapit nga baeay. Pag abot nanda maiwat eon ro hari. Owa mabuhayi, namatay ro hari. Nangin hari si Mukong. Malipayon sandang nagkabuhi ag kon amat guina bisitahan nana ro anang katamnan ag kahayupan. /MP