Thursday, May 16, 2013

Sugilanon Ni Tita Linda

Ni Tita Linda Belayro

Tongod Sa Oyahon Ni Sarah


Natawo nga maeaw-ay si Sarah. Ro anang ilong hay mingko tinungton nga kamatis ag ro anang bibig hay buskad pa. Tongod sa anang itsura, guina paingtan imaw ko anang ama. Permi nga naga inaway ro anang ama ag ina hasta nga nagbueag sanda. Nagpanaw man ro anang ina sa ibang banwa agod malipatan rong anang kahuy-anan. Solo nga naga palangga kay Sarah hay ro ana gidlang lola.

Ko isaeang agahon ngaron, nabugtawan ni Sarah nga mataas ro eagnat ko anang lola. Owa guid imaw it kwarta para ibakae it bueong. Nag panaw imaw agod mag usoy it pambakae it bueong. Sa anang pagpinanaw, may hasandaran imaw nga papel nga naka higot. Anang guin pueot. Sa anang pagbukad, may hakita imaw nga sobre. 

Anang guin bukad. Puno it kwarta. May pangaean nga Joaquin Santillan ro sobre ag naga estar sa subdivision maeapit sa andang lugar. Guin usoy nana ro tag ana pero indi imaw pagpasudlon ko gwardiya sa poeta it kurae. Guin tawagan ro baeay nga guina estaran it tag ana. Gin sugtan nga pasudlon si Sarah.

Nagpadueong si Sarah sa baeay it mga Santillan. Guin uli nana ro kwarta. Sa kalipay ni Mr. Santillan, guin taw-an nana it kwarta si Sarah agod ibakae it bueong. Nangayo it Address ni Sarah si Mr. Santillan. Nagmayad ro lola ni Sarah pagkatapos nga ipabueong.

Ro habilin nga kwarta hay guin bakae ni Sarah it mga junks ag nangin dealer eon imaw it mga basura. 

Ko isaeang agahon ngaron, may auto nga nagpundo sa my junk shop ni Sarah. Si Mr. Santillan gali ro sakay. Nanaog imaw. Guin abi-abi ni Sarah ag guin pakilaea sa anang lola. Nagkakilaea sanda. Ro anang lola gali ro mabuhay eon nandang guina inusoy. Ina gali ni Mr. Santillan ro anang lola. Guin aywan imaw ko tatay ni Mr. Santillan tongod pobre. Guin pakasae imaw sa isaeang ka baeo nga manggaranon. Haaywan ro anang lola ag ro anang ina ni Sarah. Nabilin si Mr. Santillan sa anang ama. 

Sa pagkita kay lola ni Sarah, guin daea imaw sa anang lolo nga mabuhay eon nga baeo ag naga pungko eon lang sa “wheel chair”. Nagbalikan ro anang lola ag ro anang lolo. Halin kato, malipayon si Sarah. Saeamat sa anang kaeo-oy. Imaw ro instrumento it Diyos agod magkilita ro mga mahae nana sa kabuhi. Pag abot it paskwa, nagpauli man ro anang ina nga may bag-o man nga asawa. Malipayon ro bilog nga pamilya Santillan. Ogaling eabaw sa tanan, si Sarah ro pinaka malipayon tongod sa anang maeaw-ay nga oyahon. /MP

No comments: