Monday, December 26, 2005

MDCC Response To Typhoon Quedan

Sa gulpi nga pagbaha ko Desyembre17, 2005 it Sabado, ro Kalibo Municipal Disaster Coordinating Council (MDCC) hay nagconvenar para mapangatubangan ro krises, kaibahan ro Barangay Disaster Coordinating Council, Philippine National Police, Bureau of Fire Protection, Philippine Army, Metro Kalibo Water District, RECAG, Kabalikat-Civicom, Municipal Auxiliary Police, mga Barangay Tanod ag Civilian Volunteer Organizations, nagpatigayon it isaeang ka massive rescue and relief operation sa 16 nga barangay it Kalibo. Suno sa status report it MDCC sa oras it 7:00 ro hapon may naapektuhan nga 132 ka pamilya nga may 543 nga miyembro. Ro 59 kara nga pamilya hay sa sueod it Evacuation Center nga may 240 nga miyembro. Resulta ro gulpi nga pagbaha it sigidas nga inuean sa kabukiran it Aklan.
Ro halit sa imprastraktura hay umabot sa PhP 15 milyones sa Kalibo kaibahan kara ro mga dike, breakwater, perimeter fence, Administration Office it Munisipyo nga nahamtang sa dumping site, ag ro mga parte it footbridges sa Bakhawan Eco-Park sa Barangay New Buswang. Samtang ro halit sa atong mga pananum ag agrikultura sa sueod it Kalibo hay umabot sa PhP 5 milyones. Tungod man sa krises, ro Sangguniang Bayan hay nagpasa it isaeang ka Resolution nga nagbutang sa banwa it Kalibo sa idaeum it State of Calamity.
Sa tonga it krises ginapakita ro determinasyon it Kalibonhon, mga grupo ag organisasyon nga makabulig sa ana nga pamilya ag isig-ka tawo paagi sa pagbueoligan sa atong lokal nga gobyerno nga ginapangunahan ni Mayor Raymar A. Rebaldo.

ATI-ATIHAN 2006 Update
Idto mat a sa sueod it Magsaysay Park sa Hala Bira Ati-Atihan Nights halin it ika 9 hasta 15 it Enero 2006 hay maga butang it Night Flea Market. Ipagbawae ro pagbaligya it makahieilong mga ilimnon sa palibot. Raya nga tikang hay kagustuhan it mga pamueoyo nga maging mahilway ro mga programa sa sueod ag sa guwa it Magsaysay Park ag maging family-friendly ro palibot.
Ro Night Flea Market ngara hay bukas halin adlaw hasta gabii kadungan it Hala Bira Ati-Atihan Nights. Maga-showcase man it food products, trade crafts, 2nd hand clothes ag iba pa.
Sa ma abut nga 2006 Kalibo Santo Niño Ati-Atihan Festival, padayon ro isaeang ka pag-showcase it talento it mga Kalibonhon ag Akeanon sa January 10, 2006, alas Syete it gabii, eakip ra sa week-long Hala Bira Ati-Atihan Nights sa Magsaysay Park. Raya ro ginatawag nga Balik-Bayan and Ati Fashionista Nights. Sa rayang kahigayonan, makita naton ro mga produktong Kalibonhon ag Akeanon nga human sa Piña cloth. Ipakita ra it mga lokal nga fashion trendsetters ag haute couture specialists.
Sa pareho nga gabii, magahiwat man it isaea nga paindis-indis ag magapili it on the spot nga kandidato para sa Balikbayan Muse. Pagabotohan imaw paagi sa pagpalibot it money box para hueogan ko andang kontribusyon para magdaog ro andang ginpili nga kandidato.
Ro magadaog hay igaproklama nga Balikbayan Muse. Ag ro mga kontribusyon nga habuoe hay igastu sa pagpahuman it mga proyekto it Kalibo Ati-Atihan Management Board sa pagpanami it atong 2006 Kalibo Sto Niño Ati-Atihan Festival.
Pagapadayonon ni Mayor Raymar A. Rebaldo ro pagtau it tama ag sa oras nga impormasyon parte sa preparasyon naton para sa 2006 Kalibo Sto. Niño Ati-Atihan Festival. “Ro well-informed Kalibo hay isaeang ka righteous ag responsive nga banwa,” sono kay Rebaldo.
Sa paeaaboton nga Enero 11, 2006 may bag-o man nga makita sa atong mga kalye dahil ro Kalibo Ati-Atihan Management Board (KAMB) hay nagpadaea it imbitasyon sa iba-iba nga mga munisipalidad iya sa probinsya it Akean nga maka-participate ro andang town fiesta celebration kamana ko Banig Festival ko banwang Nabas ag Sto. Niño Ati Atihan it mga banwang Makato ag Ibajay.
Sanda ngara hay maga-paambit sa mga Kalibonhon ko anda nga kinaibang tradisyon sa Ati-Ati o pyesta it andang munisipyo. Dikara mapakita nga ro mga selebrasyon it atong probinsya hay solo eamang tungod tanan kitang Akeanon ag ro mga pyesta ag selebrasyon hay para sa kadaeag-an it Akean. (Terence June T. Toriano) /MP mailto:madyaas_pen@yahoo.com

1 comment:

Anonymous said...

For the Ati-Atihan committee, hope you will take the street children out of the streets during this festival at least...