Kinumpirma ni Manny "Pacman" Pacquiao na natanggap na nila ni Jinkee ang imbitasyon sa White House na makipagkita kay US President Barack Obama at First Lady Michelle Obama.
"Oo, may invitation kami mula sa White House at ngayong February na yan," nakangiting sagot ni Manny sa tanong ng PEP (Philippine Entertainment Portal) nuong Sabado, February 5, during the 10th birthday party of Pacman’s eldest, Jemuel, at the Palms Country Club in Alabang.
"Siyempre, excited tayo dahil matagal ko nang pangarap na makaharap at makausap si US President Obama. Isa ito sa hindi ko malilimutan na parte ng buhay ko dahil malaki ang paghanga ko sa kanya," dagdag pa niya.
Si Manny nga ang magiging kauna-unahang Filipino boxer na maka-kapasok sa White House sa Washington DC. Hindi nga basta-basta nang-iimbita ang White House ng mga celebrities at kapag nakatanggap ka ng invitation, ibig sabihin ay isa kang importanteng tao sa mundo.
"Nakakataba ng puso ang pagkilala nila sa atin. Kahit saan naman ako magpunta, dala-dala ko ang bansa natin. Pinag-mamalaki ko ang pagiging Pinoy natin at hanggang sa White House ay dala natin ito," sabi ni Pacman.
Excited rin ang asawa niyang si Jinkee. Hindi siya makapaniwala na makakarating na siya roon at makikilala niya ang presidente ng United States of America.
"Hindi ko alam ang gagawin ko or masasabi ko kapag nandoon na kami. Baka matulala na lang ako kapag nasa harapan namin sila," tawa pa niya. "Bahala na kung ano ang mangyari. Basta huwag lang akong kabahan."
May mga pinag-pipilian na nga raw na isusuot si Jinkee sa pagpunta nila ni Manny sa White House. Gusto raw niya ay simple pero elegante ang dating.
"May napili na ako before. Pero may mga tinitingnan pa ako na iba pang mga damit. Siyempre, ayoko namang mapahiya si Manny sa akin. Kailangan presentable ako bilang misis niya.
"For sure, maganda ang suot ni First Lady Michelle Obama. Sana magandahan siya sa mapipili kong isusuot ko."
10TH BIRTHDAY
Masayang idinaos ang 10th birthday party ng anak ni Manny at Jinkee Pacquiao na si Emmanuel Jr. or Jemuel na ginanap sa Grand Ballroom ng Palms Country Club sa Filinvest Alabang nuong February 5.
Wrestle Mania nga ang theme ng birthday party ni Jemuel at karamihan sa kanyang mga bisita ay mga classmates at kaibigan niya sa kanyang pinapasukang Brent International School.
Hindi nga siyempre nawala ang mga sikat na magulang ni Jemuel na sila Manny at Jinkee. Present din ang mga kapatid niyang sila Michael, Princess at Queenie Pacquiao.
Hindi nga raw tumanggap ng anumang appointment si Pacman para mag-enjoy siya sa birthday party ng kanyang anak. Hindi nga kaila sa lahat na busy ito sa kanyang trabaho bilang congressman, pero para raw sa kanyang pamilya ay maglalaan siya ng oras.
"Basta pagdating sa family ko, sila ang uunahin ko," ngiti pa ni Pacman.
"Nag-promise ako kay Jemuel na hindi ako magiging busy sa birthday party niya. Gusto kong makasama ang mga kaibigan niya at ang mga magulang nila sa importanteng araw ng kapanganakan niya."
Wish nga ni Manny na lumaki na mabait, magalang, at may takot sa Diyos ang kanyang mga anak.
"Wish ko rin na maging maganda silang example sa ibang kabataan ngayon. Habang bata, tinuturuan na namin sila ng mga magagandang asal. Gusto namin na maging kapaki-pakinabang sila sa bansa natin balang-araw."
Si Jinkee naman ay hindi inaasa sa ibang tao ang paghanda ng birthday party ni Jemuel. Tumulong din siya sa pag-asikaso nito.
"Tuwing sasapit naman ang birthday ng mga bata, hindi puwedeng hindi ako tumulong. Hindi kumpleto kung hindi ako kikilos para maging maayos ang party nila," sabi ni Jinkee.
WRESTLE MANIA THEME
Si Jemuel nga raw ang pumili ng Wrestle Mania theme para sa party niya.
"Tinanong namin siya kung ano ang gusto niyang klaseng party? Gusto raw niya ay yung wrestling. Paborito niya kasi ang mga wrestling stars. Kaya okey lang, birthday naman niya," kwento ng kanyang ina.
"Pero sinabi ko kay Jemuel na okey lang na paborito niya, huwag lang siyang maging wrestler! Parang mas mahirap iyon kesa sa boxing, ‘di ba? Dasal ko na huwag siyang maging wrestler!"
Inamin ni Jinkee na minsan ay naiiyak siya dahil ang bibilis daw lumaki ng kanilang mga anak ni Manny. Kelan lang daw ay mga babies lang sila, pero ngayon ay malapit nang magbinata.
"Nagugulat nga ako, ang bilis nilang lumaki. In five years, mga binata na sila at panliligaw na ang gagawin nila. Huwag pa naman sana dahil para sa akin, mga babies pa rin sila.
"Pero ang maganda ay yung nakikita ko silang lumalaki. Parati naman akong kasama ng mga bata kaya alam ko ang mga gusto nila at mga kinikilos nila," ani Jinkee.
"Tulad nga ngayon, nasasama na sila sa mga biyahe namin ni Manny. Nitong nakaraang Pasko at New Year, out of the country kami. Kasama namin ang mga bata kaya mas enjoy. Unlike noon na nami-miss namin sila."
Wish nga ni Jinkee na huwag daw munang makaisip si Jemuel na manligaw or magkaroon ng crush sa mga classmates niyang babae. /MP
No comments:
Post a Comment