Thursday, February 10, 2011

Sugilanon Ni Tita Linda


Ni Tita Linda Belayro
El Rancho Grande
May Rancho Grande nga guina panag iyahan ni Don Leon. Pinaka maeapad nga ranchohan ra sa Mindanao. Kon ano ka eapad ro hacienda hay imaw man ka estrikto ro tag ana. Bawae magsueod sa mansiyon ro mga tawo. Pulos guwardiya ro palibot.
Sulo eamang bisita nga negosyante ro makasueod nga guina giyahan it mga guwardiya pa. Kon sin-o man nga may katuyo-an kay Don Leon, kinahangean makipag areglo imaw sa anang mga tawohan parabil pasudlon.

Isaeang adlaw, nag masakit si Mario ag kinahangean nanda ro kwarta. Naghinyo si Pacing asawa ni Mario sa guwardiya agod makaatubang kay Don Leon. Guin pasueod si Pacing ogaling owa sanda pagpahueama tongod abo eon ro andang utang. Nagpakitlu-oy si Rita, ro onga ni Mario ag Pacing nga haum imaw mag pamutsatsa bilang bayad sa andang kautangan.

Nagpasugot si Don Leon. Guin pa hueam it kwarta sanda. Bilang alila, ana tanan ro trabaho ni Rita.

Mapintas man ro solo nga onga nga babaye nga si Bella. Guin tiis tanan rondaya ni Rita. Ro mabuot eang hay si Benjie, ro ampon nga eaeaki ko Don. Anang guin taw-an it pagkaon nga halin sa refrigerator si Rita. Pagkatapos it high school, guin padaea sa Manila si Benjie agod idto magpadayon it pagtuon. Samtang ro onga nga babying si Bella hay padayon sa maluho nga pagpangabuhi.

Tag nagmasakit si Donya Isabel tongod sa pirmeng naagahan sa sugaean, kinahangean nga daehon sa Amerika agod ipaboeong. Tongod indi man magmunot si Bella, si Rita ro guin padaea agod magtatap kay Donya Isabel. Nagtener sanda it mabuhay sa Amerika.

May kadungan nga pasyente si Donya Isabel una sa hospital. Kon naga katoeog ro Donya, guina tatap ni Rita ro isaeang ka magueang. Naila ro magueang, busa guin aywanan nana it kwarta si Rita. Ka’t nagmayad ro magueang, guin pangayo nana ro address ni Rita iya sa Pilipinas. Nag mayad sa masakit si Donya Isabel. Sa owa mag buhay, nakauli man sanda Pilipinas.

Sa owa magbuhay, may nag bisita. Hakibot si Donya Rita kat may nag usoy kana. Hakilaea nana si Stewart, ratong anang guin buligan sa hospital. Buot imaw nga pakasaean ko magueang.

Nagsugot sanda. Guin bayran anay ro mga utang it daeaga sa Donya parabil magmunot imaw sa America.

Tumaliwan ro limang dag-on, nagbakasyon si Rita sa Pilipinas. Hasayran nana nga guina embargo eon it bangko ro Rancho Grande. Nanugunan imaw tongod dikaron imaw nagbahoe. Busa, sanda ro nag-eokat ko rancho ag nag panag iya. Pagbalik nanda sa America, inatake ag namatay ro magueang nga asawa ni Rita. Imaw ro nag iridar ko tanan nga manggad it magueang. Nagbalik imaw sa Pilipinas.

Husto man nga guindaea sa hospital si Benjie. Indi nana mabaton nga ro manggad ko anang guinikanan hay ubos eon. Guin bisitahan imaw ni Rita sa hospital hasta nagmayad ag naka guwa. Dati mat-ang naila si Benjie kay Rita ag tongod man sa kabuot ni Benjie kay Rita, owa magbuhay, hay guin kasae sanda. Una man guihapon sanda nag estar sa Rancho Grande. /MP

No comments: