Sugilanon Ni Tita Linda

Ni Tita Linda Belayro

Si Surft, Ro Kuring Ni Binoy

May isaeang ka alila nga kuring si Binoy. Hapueot nana ra sa kalye. Anang guin uli sa andang baeay ag guin pakaon. Maila-on si Binoy sa mga hayop. Kaibahan nana ro kuring sa anang pagkatoeog maskin sapat ro kuring, may tumaeagsahon nga abilidad si Surft. Mataeum ro anang paghugom ag pagpamati. Malimpyo man rondayang kuring tongod guina tampukan nana it baeas ro anang higko.

Maila-on man mag pamasyar si Binoy. Isaeang adlaw, samtang naga pamasyar ro daywa sa plaza, hakita ni Surft kon paalin guina dukot ro isaeang ka kahita sa bag it babaye nga indi mabatyagan. Sa anang pagkakita sa mandurokot, golpeng lumiksi si Surft ag kaeoson ro eaeaki, busa hapilak nana ro wallet. Guin sunod ni Binoy ro anang kuring ag hakita nana kon paalin guin bawi ro kahita sa ratong manakaw.

Nag eapta ro balita hanungod sa hanabo sa mandurukot. Guin dayaw ro kuring ko mga tawo. Bilang premyo, guin pakaon ro kuring ag si Binoy it manamit nga mga pagkaon sa isaeang ka maeahaeon nga restaurant. Matapos ro pag ilabas, guin kulentasan pa it medalya si Surft. Pag abot it gabii, sige ro inuean sa lugar ni Binoy. Habugtaw imaw sa pagkinaeos kana it kuring. Madaeum eot-a ro baha sa andang lugar, busa guin pasaka nana ro tanan nga igdaeapat sa ibabaw it baeay.

Tumaliwan ro sang dominggo. Ko gabii, parabil hikatoeogan, hakibot si Binoy sa pag eopok it baril. May manakaw nga nagsaka sa baeay ko andang kaeapit. Hadaea ko mga manakaw ro mga mahaygang bagay. Parabil pa nag abot si Binoy sa tinakawan, hay nakaadto eot-a si Surft sa pihak nga baeay ag anang guin sundan ro mga manakaw hasta nakaabot sa isaeang ka bodega.

Pagkaaga, nag suguid ro tag anang eaeaki hanungod sa pagpanakaw sa pulis. Guin usisa nanda kon paano nakasueod sa bodega ag kon siin nagguwa ro mga manakaw. Ka’t nag imbistiga ro mga pulis, sige man ro kinaeos ni Surft kay Binoy. Guin sundan nanda ro kuring ag idto sanda guin daea sa bodega. Haabutan nanda nga naga katoeog pa ro mga manakaw. Habawi ro tanan nga tinakaw ag guin sabitan eon man it medalya si Surft.

Tongod sa mabahoe nga bulig ni Surft sa komunidad, guin padung-gan imaw paagi sa pag pa-ugdok it isaeang ka rebulto sa plaza. Abo pa ro habuligan ni Surf ag ro pangaean man ni Binoy hay nag sikat man. Maskin siin sanda mag adto guina dinayaw nanda ro kuring ko anang tumaeagsahon nga abilidad. /MP