Sugilanon Ni Tita Linda

Ni Tita Linda Belayro

Amaeanhig

Ro amaeanhig hay isaeang ka tawo nga maskin magueang eon hay mabuhay mamatay. Guina hibaygan nana ro pilang beses nga paghana ni kamatayon. Suno sa mga katigueangan ro amaeanhig hay abo pa kuno ro anang guina pas-an nga kasae-anan. Owa pa imaw naka hinoe-soe, busa indi pa pagbatunon ni San Pedro sa eangit.

Maskin sa edad nga 100 dag-on, sarang pa maka saka it kahoy. Ogaling mga tiko nga kahoy eang. Ro tawong guina eagas it amaeanhig, kinahangean nga deretso ro anang pagdaeagan agod indi imaw maabutan. Kon mapatay nana imaw, hay naga bangon dayon ro amaeanhig ag naga inom it tubi.

Si Bastian sangka amaeanhig hay mabakod pa guihapon. Sa edad nga 100 dag-on, nakasaka pa imaw sa kahoy nga buktot ag abong mga sanga. Pagkamatay ni Bastian tongod sa tama it baril, nagbangon imaw pagkaaga nga matsa naghalin sa pagkatoeog. Nag adto imaw sa suba agod magpaligos. Tongod sa anang kagueang, bu-ot ko anang mga onga nga mag pahuway eon imaw, ogaling mabakod pat-a man imaw.

Guin pangutana imaw kon basi may guin eobong kana, nagsugid imaw nga katong nagtaliwan nga giyera habaril imaw ag guin butangan it saway ro anang nina. Pag ueat ko nina, haaywan idto ro saway. Guin paoperahan ratong nina nga guin tubuan eon it unod. Guin bo-oe ratong saway ag golpeng nag-eoya ra imaw hasta namatay.

Guin butang imaw sa kabaong nga naga koeob ag guin hapinan it dahon it bago ro anang guina eogban. Owa eon naka bangon si Bastian amaeanhig. Natapos ro gahum ko anang pagka amaeanhig. Umpisa kato, owa eon it habatian hanungod kay Bastian. Nangin malinong man ro pamilya ni Bastian tongod naka pahuway sanda sa pagtinatap ko amaeanhig nga guina hibaygan permi ro paghana ni kamatayan. /MP