Mangin masako makaron ro pagpatikasog it Civil Service Commission (CSC) Field Office iya sa probinsya it Aklan bangod sa nakataeana nga eksaminasyon nga paga-hiwaton sa Oktubre 16 kon siin abu ro nag pasakop nga magbuoe.
Suno kay Director Evelyn Ejar, it CSC-Field Office iya sa Kalibo, may 1,698 nga aplikante para sa Career Service Professional ag 439 man para sa Sub-Professional nga nag pasakop agud magbuoe it rayang eksaminasyon.
Mabahoe rayang bunyog makaron nga dag-on kumpara ku mga nagtaliwan nga dag-on, suno kay Ejar.
Nanotisyahan man nanda nga ku pilang dag-on nga pagtinao it eksaminasyon, mas abu ro mga bata-on ku sa mga may edad. Raya hay nagapakita nga abu nga mga bata-on ro mga may pagkagusto nga magsueod sa gobyerno.
Suno pa gid kay Ejar, base sa mga resulta it eksaminasyon, mas abu nga mga bata-on ro nakapasar ku sa mga may edad eon.
Bangud abu ro manugbuoe it eksami-nasyon makaron nga dag-on, ginsugo sanda ni Ejar nga sayuron eagi ro andang mga naka taeana nga sueod paagi sa pag tan-aw kara sa website it CSC.
Ro eksaminasyon makarong dag-on hay hiwaton sa Kalibo Pilot Elementary School ag Kalibo Elementary School, Poblacion, Kalibo.
Dikara man ginhiwat ro eksaminasyon ku mga nagtaliwan nga dinag-on.
Euwas sa ginatawag nga Pencil and Paper examination, mahimo mang makabuoe ro sangka tawo it eksamin paagi sa computer, ogaling kinahangean hay mag eaong anay it online ro aplikante, ag idto magbuoe sa Central Office it eksamin.
Owa eon man makaron ginalimitahe ro pagbuoe it eksaminasyon bisan pilang beses, basta may pae-at eang nga tatlong buean. (by Venus G. Villanueva) /MP
No comments:
Post a Comment