Sugilanon Ni Tita Linda

Ni Tita Linda Belayro

Guindaea It Swerte

Si Samson hay isaeang ka palaboy-laboy nga eaeaki sa kalye. Naaagahonan imaw sa bangketa. Rondaya ro anang toeogan kada gabii. Naga haboe imaw it baeasahon o maskin anano nga karton nga anang mapueot sa basurahan. Makasamit eang imaw it pagkaon kon maitsahan it pilang sentimo sa pagbantay nana ko mga saeakyan nga naga parada sa atobangan it mga opisina.

Owa imaw nakasayod kon sin-o ro anang mga ginikanan. Hadumduman nana nga idto imaw naga estar sa anang guina kilaea nga tiya. Tongod mapintas ro anang tiyo busa nag ea-as imaw hasta una imaw napad-pad sa rondayang lugar.

Isaeang adlaw, sam-tang naga trapo imaw it isaeang ka kotse nga anang guina bantayan, may hakita imaw nga mga binatilyo nga andang guina tukeap ro mga igdaeapat it kotse nga guin parada sa pihak nga karsada.

Eagi-eagi, dali-dali nana nga guin inga-an. Owa mag pamati. Anang guin eagas ag guin karate. Hakita sanda it guwardiya busa nadakop ratong mga binatilyo.

Duro ro pag-pasaeamat ko tag-ana it saeakyan. Pag uli sa andang baeay, guin daea si Samson ag nagsunod man imaw. Idto imaw nakasamit it manamit nga mga pagkaon. Solohanon man lang gali si Randy nga unga busa guin bilang nanang igmanghod si Samson, ro dating palaboy-laboy nga tawo.

Umpisa kato, may direksyon eon ro kabuhi ni Samson. Agud magbag-o ro anang pagkatawo, guin bak-ean imaw it naog ag guin bestihan imaw it mayad. Guin patun-an si Samson sa pribado nga eskwelahan ag guin islan ro anang pangaean kay Sam paagi sa guin duhoe nga "petition for correction of entry in the Birth Certificate" sa Regional Trial Court.

Adlaw nga Sabado, haaywan si Sam sa baeay. Nagpanglimpyo imaw sa mga kwarto ag mga kwadro. Isaeang ka retrato it magueang ro nakatawag ko anang panan-awon. Mingko may bu-ot hambaeon kana ro magueang. Guin turo kana ro mabahoe nga rebulto una sa kwarto. Guin alsa nana ro rebulto ag tumambad sa anang atubang ro mga papeles. Anang guintago. Pag abot, guin pakita nana kay Randy. Ro sangka papel guin basa, ag idto nakasaad nga may isaeang ka onga rondayang magueang ag may apo pa imaw nga mabuhay eon nga guina inusoy.

Ro magueang hay namatay sa isaeang ka aksidente. Ogaling, parabil imaw namatay, anang guin himo ro tanan nga documento. Ro sambatong documento naga saad: "kon sin-o man ro makakita ko rayang guin tago nga papeles hay imaw ro akong guina inusoy. Si Randy hay bukon it kadugo ko magueang kundi onga ko anang hardinero apang nagbahoe sa magueang nga mabuot nga namatay tongod sa aksidente.

Sa pag-abot ni Sam sa kabuhi ni Randy, daywa eon sanda nga nag atipan ag nagpadayon sa mga negosyo it ratong magueang nga nagtaliwan tongod sa aksidente. /MP