Sugilanon Ni Tita Linda

Ni Tita Linda Belayro

Nabungkag Nga Sumpa

Malipayon eon kunta ro mga pumueoyo it kaharian ni Haring Alpheus tongod natawo eon kanda ro isaeang ka prinsesa. Gwapahon ro eapsag, ogaling may bituon sa anang dahi.

Abo nga naga kangawa kon anong signos ro dueot ko rondayang bituon sa dahi it prinsesa, busa guin pangutana nanda sa andang orakulo agod matungkad ro minatuod-tuod nga bu-ot hambaeon. Suno sa orakulo, maka asawa ro prinsesa it halimaw, ogaling bisan halimaw mat-a hay mangin malipayon mat-a imaw sa rondayang halimaw.

Rondaya hay matabo sa ika-18 dag-ong ka adlawan ko prinsesa. Nagkasubo ro hari busa owa nanda guina paguwa-a ro prinsesa agod indi makita it maski sin-o man nga eaeaki. Masinueob-on ro prinsesa tongod matsa guina preso imaw sa isaeang ka tore it palasyo, owa it kahilwayan. Abo gid nga naga handum sa anang ka gwapa ogaling guina bantayan imaw it gwardiya parabil ro sangka tawo maka saka sa tore it palasyo.
Isaeang adlaw, samtang naga pahuway ro mga gwardiya, nakabati sanda it sadya-an nga musika nga matsa naga paya ag naga patoeog. Sa owa magbuhay, hakatoeogan ro tanan kutob sa nakabati. Sumaka sa tore ro naga kanta ag idto hakita ko prinsesa ro isaeang ka halimaw. Owa mat-a imaw mahadlok. Guin pasaylo pa nana ro halimaw. Halin kato, permi eon sanda nga nagakita.

Pag-abot it kaadlawan ko prinsesa pagtungtong sa ika-18 dag-ong edad, nag eaong imaw sa hari nga mag asawa eon. Hakibot ro hari kon sin-o ro anang nobyo. Guin pakilaea nana ro halimaw sa anang amang hari. Owa sanda it nahimo kundi magpasugot.

Ko gabi-i ngaron parabil sa oras ko andang kasae, nagbaylo ro dagway ko halimaw. Nangin gwapuhon imaw nga prinsipe. Guin sumpa gali imaw nga mabalik sa dati nanang anyo kon maka asawa imaw it babaye nga may bituon sa anang dahi. Nagkalipay ro tanan eabi guid ro prinsesa. /MP