Ni Tita Linda Belayro
Ro Kuneho Nga Duro It Amigo
Guina pabugae ni Kuneho (Rabbit) nga abo kuno imaw it amigo. Maskin siin imaw mag adto hay abo kanang naga abi-abi. Ogaling guina tigban manlang nana ro anang mga amigo. Kada adto nana sa ibang lugar hay naga pinangayo man lang ro anang obra. Ko olihi hay umabot ro oras nga tinak-an eon kana ro anang mga amigo. Buot eon nanda nga taw-an it leksyon ro Kuneho.
Isaeang adlaw, samtang naga pinamasyar ro Kuneho sa anang mga amigo, may habatian sanda nga eopok ag eahay it mga ayam. May naga pangayam eon man gali. Naga dakop man it mga hayop agod daehon sa palasyo. Isaea sa paborito nga guina dakop it prinsipe hay Kuneho agod alilaan sa palasyo.
Hinadlukan ro Kuneho. Dumaeagan imaw sa anang amigong Kanding ogaling nagbalibad ro Kanding tongod nahadlok man imaw ay basi mabali ro anang likod kon anang pas-anon ro Kuneho. Ro masunod nga guin adtunan nana hay ro Usa. Pareho it Kanding, nagpamalibad man ro Usa tongod bag-o eamang guin putoe ro anang sungay ag basi mabughat imaw. Ro katapusan nana nga guin adtunan hay ro amigong Kabayo.
Pareho it Kanding ag Usa, nagbalibad man kana ro Kabayo tongod bag-o eamang imaw nga guin hilot sa anang siki sa pangarera. Naga eapit nga naga eapit eon ro mga ayam. Madali eon lang imaw maabutan. Dali dali si Kuneho nga lumiksi ag pinaspasan it daeagan hasta nakalibre imaw.
"Abo man kunta ro akong amigo ogaling indi man masaligan sa oras nga kinahangean", pagno-oe nga sambit it Kuneho. /MP
No comments:
Post a Comment