Sugilanon Ni Tita Linda

Ni Tita Linda Belayro

Puti Nga Sawa

Katong mabuhay eong tiyempo, may isaeang ka hari nga kilaea sa anang ka-aeam. Ro hari hay may tumaeagsahon mang batasan. Kada agahon, guina daehan imaw it pagkaon nga guina takpan sa isaeang ka sueodlan. Indi ko hari pagbuksan ro sueodlan kon may naga tan-aw nga ibang tawo. Idto imaw naga kaon nga solohanon sa sueod ko anang kwarto.

Isaeang adlaw, ro guina saligan nana nga mamulig hay hangawa kon ano ro sueod ko rondayang sueodlan. Guin buksan nana it sekreto ag hakita nana nga eaha nga sawa gali ro sueod. Guin samitan nana it sangkiri. Maangan-angan, habatian nana ro pag hinuni it mga pispis. Rato galing pagkaon hay nakata-o kana it gahum nga maka eobot ko lingwahe it mga pispis ag iba pang mga hayop.

Hanabu-an man nga naduea ro singsing it Reyna. Guin pabangdan ro mamulig nga imaw nagbo-oe. Nagpamalibad imaw ogaling owa pagpatihi. Busa mapreso imaw kon indi makita ro singsing.

Masinueob-on ro mamulig nga nag adto sa hardin. Hakita nana nga abo nga mga bebe nga naga linangoy sa sapa-sapa ko hardin. Naghambae ro sambilog nga bebe.
"Mabug-at guid tana ro akong bueon-bueonan makaron. Hatueon ko abi ro singsing it reyna sa akong pagmadali", hambae it bebe.

Pagkabati ko mamulig, dinakop nana eagi-eagi ro bebe ag dinaea sa kusinero agod easa-on para sa ihapon. Pagpatay sa bebe, hakita ro singsing it reyna sa bueon-bueonan it bebe.

Guin daea ko mamulig ro singsing idto sa hari. Tongod sa pag uli it singsing, nagpati ro hari nga imaw hay inosente. Bilang kabayaran, guin papili imaw ko hari kon ano ro anang gusto. Nagpamalibad imaw ko guin tao kanang manggad, kundi puwera eamang sa isaeang ka kabayo ag kwarta agod makalibot imaw sa bilog nga kalibutan ag makita nana ro anang swerte. /MP