by DONIEL B. AGUIRRE
Nagpahayag it kalipay ag pagpasaeamat si Mayor William Lachica, Honorary Chairman it Kalibo Sto. Nino Ati-Atihan Foundation Incorporated (KASAFI), sa mga nangin bisita, mga huwes sa nagtaliwan nga selebrasyon it Kalibo Sto. Niño Ati-Atihan Festival, Tri-Media, mga opisyales it mga Brgy., mga kapulisan, sa chairman it KASAFI ag anang mga kaibahan sa panga-ean ku munisipyo it Kalibo bangud ku madinaeag-un nga selebrasyon it Kalibo Ati-Atihan. Para sa Alkalde, mayad-ayad ro pagpatigayon it selebrasyon tungod nga makaron nga dag-on hay abo ro mga balik bayan.
Sa pihak nga parte, emosyonal man nga nagpa-abot it pag pasaeamat si Mr. Albert Meñez, chairman it KASAFI. Suno kana, haum eon sanda para sa 2013 nga pagsaueog ko Kalibo Sto. Niño Ati-Atihan Festival. Ginbalita ni chairman Meñez nga naga-umpisa eon ro andang mini gallery kamana man nga naga-proponer sanda sa LGU Kalibo it proyektong Ati Village ag Piña Village. Rayang proyekto kun matuman hay isaea man sa mangin tourism destination sa Kalibo.
May mga proyekto man sanda makaron para sa 2013. Nag tug-an man imaw sa mga nag-atender nga mga tribu nga pagadugangan ro mga subsidies ag cash prizes sa maabot nga dag-on.
Samtang ro mga kaibahan man it Kalibo Auxiliary Police hay makabaton man it bag-ong set it uniforms halin sa KASAFI hasta gid nga matapos ro termino ni mayor William Lachica. Ana man nga gin pasaeamatan ro mga Tribu sa anda karang mga sadyaan nga mga biste. Gin tug-anan pa nana nga sa sueod it daywang dominggo hay maga-report eagi sanda it “well audited financial report”.
Ginkilaea man it KASAFI ag Aklan Photographic Society Inc. ro mga nagdag-ug sa ginhiwat nanda nga Balik Ati Open Photo Contest makaron nga dag-on. Sa pagpanguna ni Mr. Ramil Buncalan, Mr. Albert Menez ag Mayor Lachica, ginpadunggan ro mga masunod: 3rd prize – Mr. Tony Magbanua it Balay Imprenta – P10,000, 2nd prize – Mr. Rey Dexter Ingeniero P20,000, ag 1stprize – Architect Mico Martelino – P30,000. /MP
No comments:
Post a Comment