Sugilanon Ni Tita Linda

Ni Tita Linda Belayro

Singsing Ag Mansanas

Magueang eon ro hari ag bu-ot nana nga maaywan ro anang unga nga prinsesa sa mayad ayad ag bagay nga asawa. Ogaling, masyadong mapili ro prinsesa.

May isaeang ka binata nga nag pangarisgar ag nagpasimpaead agod usoyon man ro anang kamaeayran. Si Gorying ro anang hayo. Guin taw-an imaw ko anang ama it isaeang ka kabayo agod masakyan. Tongod karon, anang guin pasaeamatan ro anang ama. Nagpanaw dayon imaw. Pag abot nana sa may sapa, hakita nana ro tatlong ka isda nga namaehan sa eonang sa binit. Guin panaogan nana ag guin halin sa madaeum nga tubi agod maka eangoy ag mabuhi pa sanda.

Nagpasaeamat ro tatlong ka isda kay Gorying ay nabuhi pa sanda. nagpadayon si Gorying sa anang panaw hasta nakaabot imaw sa kagueangan. May hakita imaw nga mga tutugnon it pispis nga guin haboy sa liwan it pugad tongod owa eon it ipakaon ro andang ina. Sa anang kaeo-oy, guin patay nana ro anang kabayo agod ipakaon sa mga pispis. Padayon si Gorying sa pagpanaw. Nagbinaktas imaw hasta nakaabot sa palasyo. Habasahan nana ro sangka pahisayod sa plasa. “Ro hari hay bu-ot ipaasawa ro anang prinsesa sa sin-o mang maka himo it malisod nga oeobrahon.”

Pagkakita ni Gorying sa hitsura it prinsesa sa ritrato, naduea ro anang kahadlok nga basi imaw hay paga su-ungon. Busa, nag agto imaw sa palasyo ag nag presentar nga bu-ot nanang maangkon ro pag higugma it prinsesa.

Guin daea imaw sa baybayon. Hakita nana ro isaeang ka baroto nga sakay ro hari. Guin itsa ro singsing sa may eawod. Guin sugo si Gorying nga usuyon nana ag ibalik ro singsing. Kon indi nana maibalik ro singsing hay paga pugutan imaw it ueo.

Samtang naga paino-ino si Gorying kon ano ro anang himuon agod hikita ro singsing, may nagtunga nga tatlong ka isda. May guina tus-on nga singsing ro sambato. Sanda gali ro mga isda nga anang guin buligan sa daeanon kato. Nalipay si Gorying. Guin daea ro singsing sa hari. Ogaling owa nagpasugot eagi ro prinsesa nga mag pakasae. May sambilog pa nga himuon ro binata. Kinahangean nana ro mansanas nga halin sa kahoy it kabuhi. Nagpanaw si Gorying nga owa it direksyon. sa anang kaga-oy, nagpundo imaw, hakatoeogan sa puno it kahoy. Maangan-angan, habugtaw si Gorying. May habatian imaw nga huni it pispis. Dayon, may nahueog nga bueawan nga mansanas. Naghapon sa ubos ro mga pispis ag naghuni nga raya ro kahueogan.

“Kami ratong mga pispis nga guin pakaon nimo. Nag eopad kami idto sa punta it kalibutan agod boe-on ro prutas. Nagbayad man lang kami ko kamaeayran nga guin tao nimo kamon”, hambae paagi sa huni it mga pispis. Guin daea ko binata ratong mansanas sa prinsesa.

Guin kaon nandang daywa ro prutas ag parehong nagbatyag it owa it katupong nga paghigugma ro kada isaea. Nagpakasae ag nagkabuhi sanda it malipayon nga uwa it katapusan. /MP