Wednesday, February 15, 2012

Sa Boksing, Gin Kilaea Si Marjhun Macahilig


by DONIEL B. AGUIRRE

Pasado rong reso-lusyon nga gin-proponer nanday Hon. Soviet Russia Dela Cruz ag Hon. Ananias Solina nga naga kilaea ag naga dayaw sa ginpakita nga kamayad ni Mr. Marjhun Macahilig, isaeang ka boksingerong nagdaog sa nagtaliwan nga Pinoy Pride XI nga ginhimo sa Waterfront Hotel and Casino, Cebu City ku Enero 29, 2012.
Ginpahayag ni Hon. Dela cruz nga rong joint resolution hay dueot it komendasyon sa boksingero. Si Macahilig hay gin-feature sa undercard sa siin ro main event hay sanday Milan Melindo and Juan Esgel.

Base sa anang amateur records, si Marjhun hay regular nga nakikita sa mga Provincial Government sponsored fights ag regular nga participant sa West Visayas Regional Atheletic Association Meet nga ana it DEPED. Habu-oe man ni Macahilig ku 2006 ro gold sa West Visayas Regional Meet nga ginhiwat sa Capiz. Sa Palarong Pambansa, medalyang bronze ro anang dinag-an sa kaparehas nga dag-on. Sa kabilugan, may ana nga 75 amatuer fights. Bilang professional fighter, si Macahilig makaron hay naga panguna sa mga flyweight contenders ag ika-waeo sa Oriental Pacific Boxing Federation. May 50 porsiyentong knock-out ag gina konsiderar unang contender sa Phil. Flyweight Category.

Sanday Hon. Dela Cruz ag Hon. Solina hay naghimo it resolusyon agud kilaeahon ag panginbulahan si Marjhun Macahilig bangod sa anang pagdaea it pangaeang Kalibonhon eabi guid ro Brgy. Linabuan Norte.

Dugang pa kon ham-an gin proponer ron-dayang resolusyon hay agod magserbeng inspirasyon it mga batan-on nga boksingero nga magpadayon sa andang ambisyon ag iba pang mga inunga nga sundon man ro anang pagtinguha. /MP

No comments: