Sugilanon Ni Tita Linda

Ni Tita Linda Belayro

Ro Mabuot Nga Kapre

May isaeang ka mabuot nga kapre. Una imaw naga estar sa mabahoe nga puno it Akasya maeapit sa plaza. Kon adlaw, naga katueog ra ubra, ag kon gabi-e ngani hay naga guwa agod makita nana ro tanan nga naga kaeatabo sa palibot. Sayod nana kon sin-o ro mga manakaw, snatser, mga adik adik ag mga basagulero. Sayod man nana kon sin-o ro mga mabuot ag masaligan nga mga tawo. Mabahoe nga kabulig it mga pulis ro kapre.

Kon may mga adik imaw nga makita, anang guina dakop ag guina ga-id sa poste hasta makatoeogan. Kon may naga panakaw, anang guina hampak ro andang alima hasta mabuhian ro bagay nga guin takaw. Guina daea dayon nana idto sa ibabaw it punong kahoy. Pagka agahon, makita it mga tawong naga agi sa puno it Akasya ratong nga tinakawan. Guina himus dayon it mga pulis parabil iuli sa tag ana.

May isaeang ka onga nga manog balut ro nahamut-an ko kapre. Ilo eon si Botsoy ag sanda lang ko anang ina ro naga kabuhi. Ko gabi-e ngaron, samtang nagahueat ko anang mga suki, inabot it duyog ag hakatoeogan imaw sa puno it Akasya.

Hamu-ok gid ag matam-is ro anang katoeogon. Naga-oy abi imaw. Sa anang pagbugtaw, hakita nana ro mga papelon nga kwarta sa sueod ko anang basket. Ubos man ro anang baligyang balut. Halin ko gabi-e ngato, imaw nga imaw ro naga katabo kada gabii. Agod makilaea nana ro anang amigo, nagpakuno-kuno imaw nga toeog ko pagtaliwan it pilang gabi-e. Pag abot it alas dose it tongang gabi-e, may habatyagan imaw nga kaeoskos sa ibabaw. Nanaog ro mabahoe ag mabaeahibo nga tawo ag anang guin bo-oe tanan ro anang itlog, guin bayluhan it mga papelon nga kwarta. Hakilaea eon nana kon sin-o gali kana ro naga bulig.

Parabil imaw mag uli, pagka aga-aga eon, nag ea-ong imaw sa anang amigo. Ogaling ko gabi-e man ngaron, masubo guid ro anang amigo tongod paga pukanon kuno ro puno it Akasya ay paga patindugan it proyekto. Owa it mahimo ro kapre kundi magpanaw ag mag usoy it bag-ong ilistahan. Kon siin imaw makakita it baeay owa pa imaw nakasayod. Kon makakita man imaw, bu-ot nana ro maeapit sa plaza agod mabantayan nana ro tanan nga hueag it mga tawo.

May mabahoe baeang puno ag kahoy sa inyong plaza? Basi may naga estar karon nga kapre. /MP