Sugilanon Ni Tita Linda

Ni Tita Linda Belayro

Isda Nga May Korona

Sari-sari ro naga kaeatabo sa atong libot. Hakikita sa aton nga palibot nga indi matungkad ko paino-ino it mga ordinaryong tawo ro iba ibang bagay nga naga katabo. 

Sa punto it mga siyentista, guina tindugan nanda ro pagpati nga owa it naga kaeatabo nga owa it kabangdanan. Paano naton maipahayag ro isaeang ka isda nga may korona? Indi baea ro tawo eamang ro may korona? Mga santos hay may korona man.

Maskin si Tata Indo hay indi man maka hangop ko anang nasaksihan ogaling matuod guid ro anang hakita ag nangin kabaylo ko anang kabuhi hasta imaw nag gueang. Si Tata Indo hay isaeang ka mangingisda. Haeos raya, ro pagpangisda ro anang kabuhi-an. Naka patu-on imaw sa anang mga unga paagi sa pagpangisda hasta nakatapos it kolehiyo. Agahon pa imaw, parabil magsub-eak ro adlaw ga halin sa andang baeay agod magpangisda sa eawod.

Isaeang adlaw, samtang naga binugsay imaw paadto sa madaeom, may nag uylog sa anang baroto. Sa anang paglingot, hakita nana ro isaeang ka mabahoe nga isda nga may naga kislap nga korona sa ueo. Matsa naga hinyo kana nga magmunot. Sa owa it suko-suko, binuhi-an nana ro anang bugsay ag eomompat sa tubi. Anang guin sunod ro isda hasta nakaabot imaw sa idaeom it tubi. Idto hay abo nga mga isda ag iba-ibang hayop sa eawod. 

Haabotan nana ro isaeang ka maisot nga isda nga hapiglit it mabahoe nga bato nga nagligid dueot ko pag eopok it dinamita. Guin alsa nana ro bato ag nakalibre ro maisot nga isda. Nagpakita it pagpasaeamat ro mabahoe nga isda nga imaw ro pinaka hari nanda. Guin taw-an imaw it mga perlas ag guin doe-ong paadto sa anang baroto. 

Sa anang pag uli sa anda, anang guin sugid sa anang pamilya tanan ro anang hakita. Halin sa anang pagbulig sa ratong isda nga hapiglit it bato.Halin kato, kada adto nana sa eawod, perming abo ro anang dakop. Nagmayad-ayad ro pangabuhi ni Tata Indo. Bangod kara, nahikaw ro anang amigong si Kanor. 

Tongod ko pagka malikawon ko anang amigong si Kanor, agod makabaeos ag magpang malit, nagdaea it dinamita si Kanor ko agahon ngaron. Ogaling indi igtugot it Diyos ro anang maitom nga handum. Pagsindi nana it dinamita, nag eopok eagi sa anang alima parabil hahaboy, busa nasunog ro anang bilog nga eawas. Natumba ag nahueog sa tubi si Kanor.

Guin tabang imaw ni Tata Indo nga owa guid it kalibutan nga may maeain gali kana nga handum si Kanor. Indi eon makapangisda si Kanor. Si Tata Indo hay sige pa guihapon nga pangisda maskin tapos eon ro anang mga unga ag may una-una eon ra anang pamilya. Owa ro iba nakasayod ko sekreto ni Tata Indo kundi ro anang pamilya eamang.   /MP