Sugilanon Ni Tita Linda

Ni Tita Linda Belayro

Piesta It Mga Patay

Kon may piesta ro mga buhi, hay may piesta man ro mga patay. Kon mag abot kada dag-on ro Todos Los Santos, guina paabot man it tanan nga mga kaeag nga maka bisita kanda ro andang mahae sa kabuhi iya sa eogta. Kada bisperas it adlaw it mga patay, guina buksan ni San Pedro ro eangit. Busa sa pagpanoktoro-ok ko anang manok, tanan nga kaeag nga naga hueat sa poetahan it eangit hay haum eon. 

Pagbukas ko eangit, naga paeana-og man ro tanan nga mga kaeag. Naga agi anay sanda sa sementeryo nga guin eobngan kanda. Matsa piesta ro tanan nga sementeryo. Abo nga mga tawo nga may daeang bueak, kandila ag mga pagkaon ro naga bisita sa andang mga (nitso) pantyon. Ogaling isaeang ka kaeag ro naga pungko sa anang pantyon ag naga panampu-ay. 

“Ham-an it masubo ka amigong kaeag? Dapat magkalipay ka ay mabalik eon man kita hinduna pagbagting it alas dose”, hambae ko isaeang ka bata-on nga kaeag.

“Tan-awa baea ro akong pantyon, guina eomot eon. Maskin sambilog nga bueak ag kandila hay owa guid it nakadumdom nga mag haead kakun. Mataas pa ro hilamunon ag owa pa it pintura. Bukon it pareho sa imo nga malimpyo, abo nga haead nga bueak ag kandila”, sabat ko bata-on man nga kaeag.

“Ham-an it indi ka anay mag-uli sa inyo nga baeay agod imong masayuran ro tanan?” Agda ko kakilaeang kaeag.

Dali-dali nga nag uli sa andang baeay ro masubo nga kaeag. Maeayo pa imaw, habati-an nana ro pagpakitlo-oy ko anang ina. Guina sinakit imaw ko anang pangaywang asawa. Sa kaakig ko kaeag, nag pangasa imaw. Tongod karon, nagkaea-apok ro mga igdaeapat sa sueod it pamaeay. Natumba ro aparador, natumbahan ro eaeaki, busa insigida namatay. Nahueog man ro kwadro nga may retrato ko bata-on pa nga kaeag sa anang pagtapos sa kolehiyo. Idto tumugpa sa atubang ko anang ina. Hadumduman ko anang ina nga piesta gali it mga patay ko adlaw ngaron. 

Dali-dali imaw, ro anang ina it adto sa sementeryo, daea ro bueak ag kandila. Pag abot nana idto, nangayo imaw it patawad sa anang onga. Anang guin rosaryohan. Pag-uli, nangayo imaw it bulig sa mga kaeapit baeay agod ipatindog ro mga natumba. Guin pa eobong nana ro anang asawa nga namatay.

Halin kato, kada mag abot ro piesta it mga patay, anang guina palimpyuhan ro eobong ko anang onga. Malipayon man nga naka balik sa eangit ro kaeag agod maghueat eon man sa masunod nga dag-on kon mag abot ro piesta it mga patay. /MP