Wednesday, October 31, 2012

Sugilanon Ni Tita Linda

Ni Tita Linda Belayro

Yabe Ni San Pedro


Si San Pedro ro guin tugyanan it Diyos nga magbuyot it yabe sa eangit. Imaw man eamang ro may poder nga magbukas ag magsara it eangit. 

Madali eon lang ro piesta it mga minatay ag tanan ro mga kaeag hay naga hueat eon ko adlaw nga maka balik sanda it sang adlaw sa eogta agod magbisita sa andang mga pinalangga sa kabuhi. 

Ko agahon ngaron hay naduea tana ro yabe ni San Pedro. Agod masayuran kon sin-o ro nagbo-oe, guin patunog ni San Pedro ro lingganay. Sa dagu-ob ko lingganay, tanan ro mga kaeag hay nagpadueong sa may pwertahan it eangit. Nasayuran ko tanan nga naduea ro yabe. Kon indi makita ro yabe, indi man tanan makabalik sa eogta ro tanan nga kaeag. 

Sa idaeom it eogta, may isaeang ka bukaw nga naga winarang samtang ro ibang hayop hay naga pahuway huway eot-a. Sa anang pagbalik sa puno it kahoy nga anang guina hapunan, may hakita imaw nga bueawan nga yabe nga naga kabit sa sanga. Owa nana guin baliha ro yabe tongod owa man imaw kasayod kon sin-o ro tag-ana ko yabe. 

Samtang, may daywang ka kaeag ro guin sugo ni San Pedro. Idto sanda nag agi sa sekreto nga daean nga si San Pedro eamang ro nakasayod. Pag abot nanda sa eogta, hakita nanda nga masako ro tanan sa pag preparer para sa piesta it mga patay. Sige sanda nga linibot hasta pag abot it gabi-e. Sa sobrang kaga-oy, nagpahuway-huway anay sanda sa kahoy nga guina hapunan ko bukaw. Nagpakita sanda sa bukaw ag guin suguid ro andang katuyo-an. Hadumdoman ko bukaw ro yabe nga anang hakita. Guin turo nana sa daywang kaeag kon si-in makita ro bueawan nga yabe. Malipayon nga nagpasaeamat ro daywang ka kaeag. Sa kalipay ko mga kaeag, guin regalohan nanda it ka-aeam ro bukaw ag isaeang ka kulentas nga hasta it makaron, una pa ro marka sa andang dughan. 

Madasig nga nagbalik sa eangit ro mga kaeag. Umabot ro bisperas it gabi-e. Piesta it mga kaeag. Nakabukas eon ro eangit. Malipayon ro tanan nga kaeag tongod makabalik eon sanda sa eogta agod makabisita sa andang mga mahae sa kabuhi. /MP 

No comments: