Sugilanon Ni Tita Linda

Ni Tita Linda Belayro

Si Haring Habagat Ag Haring Adlaw

Isaeang adlaw, nagsubeang sa ibabaw it panganod si Haring Habagat ag si Haring Adlaw. Pareho sanda ra nga makusog ag may mga kinaadman. Pareho man sanda nga guina kahadlokan it dagaya kon maakig. May andang mahipos nga pauna-unahan. Bu-ot ko isaea hay imaw ro kilaeahon nga pinaka makusog. Bo-ot man it isaea hay imaw man. Tongod owa it naga paiway kanda, nag paino-ino sanda it paagi agod masayoran kon sin-o gid ro mas makusog kanda nga daywa. Isaeang hapon tag naga hambae sanda, may hakita sanda nga isaeang ka babaye nga naga baktas sa kabeangan. May balabal imaw nga panyo sa anang eawas.

“Hayron ro babaye, imaw ro maka eobad ko atong guina paligban. Ipakita ko kimo ro akong kabaskog. Tan-awa kon paano ko paeoparon ro anang balabal sa anang eawas”, pagpabugae ko hanging habagat. Humuyop imaw it kabaskog-baskog. Nagkaeatumba ro mga puno ag nagkaea-apok ro mga dahon. 

Ogaling, guin hugot it mayad ko babaye ro anang balabal agod indi i-apok. Sige nga huyop ni Habagat ogaling mas pa guid nga guin hugtan ko babaye ro anang balabal. Inayawan it huyop si Habagat hasta gina-oy. 

Makaron, ana man nga torno ni Haring Adlaw. Sumilak imaw it mayad, kainit-init. Tanan ro kasapa-an ag mga tubi hay nagma-ea. Sa sobrang kainit, hino-easan do babaye. Umusoy imaw it handong, guin hukas nana ro anang balabal ag guin pahid sa anang hueas. Hakita ni Habagat ro tanan. Guin baton nana ro anang ka perdihan.

Guin kilaea nana si Haring adlaw nga mas makusog sa tanan. May natun-an imaw nga leksiyon, bukon eamang it sa pakusog-kusog maipakita ro atong kabaskog.   

Maipakita man sa husto ag naga kaigo nga paagi. /MP