Sugilanon Ni Tita Linda

Ni Tita Linda Belayro

Paboritong Amigo

Agahon eon, busa guin pukaw si Andres ko anang ama sa pagkatoeog. Sa anang pagbugtaw, guinbilinan si Andres ko anang ama nga paligsan (pa-eogaeogon) si Batik agod mapreskuhan. Pagka panaw mat-a ko anang ama, naduyog pa guihapon si Andres.
Nagpamahaw imaw. Sakay ko anang anwang nga si Batik, may nasubeang imaw nga isaeang ka magueang. Nangayo kay Andres it pagkaon. Guin balikan nana sa baeay it pagkaon. Pagkatapos ko magueang it kaon, guintaw-an nana si Andres it bosoe. "Itanum rayang bosoe. Sa sueod it limang adlaw, balikan ag diligan ko imong ihi. Indi man pagkutlon ro mga dahon sa sueod it sang buean," bilin ko magueang kay Andres. Guin tuman ni Andres ro mga bilin.
Pag-abot it sang buean, nagtubo, nag-eangbo ag nagbunga it bueawan ratong tanum. Guinbaligya nana rong bunga ag nagmanggaranon si Andres. Nagpamakae imaw ngani nageapad ro anang mga eogta, abo ro anang negosyo. Nagpa ugdok it mabahoe nga baeay. Tungod sa abong kwarta, nabuyo imaw sa anang manggad, ha-pabay-an nana ro anang anwang, si Batik.
Nag-eakbay imaw sa ibang lugar. Guin aywan nana ro anang baeay. Nagsalig imaw nga sarado ag guin kandado rong tanan nga bintana. Samtang ro anang anwang hay haaywan, ag tongod sa ka-uhaw ag gutom, nagpinanaw. May nakakilaea kay Batik nga kahilapit. Anang guin daea sa eati agod pahangeabon si Batik.
Pagkasayod ko mga tawo nga owa si Andres, andang guin saka ro baeay ag puersahan nga guin sueod. Guin pangtakaw ro anang manggad ag dayon guin sug-an ro baeay hasta nangin abo.
Pagbalik ni Andres, abu eon lang rong habilin ko anang baeay. Idto nana hakita sa anang kaeapit. Guin pabangdanan nana nga guintakaw ro anang anwang. Hadumduman nana ro si Batik. Guinbalik kana ro anang anwang ogaling indi eon magmunot kana. Maskin alinon nana it guyod ro anang kaeat hay indi gid tana mapasunod.
Golpe imaw nga habugtaw. Damgo man lang gali rong tanan. Guin usoy nana ro anang anwang. Una sa idaeom it mangga naga euko maeapit sa baeay. Guin hakus nana ro anang anwang nga permeng kaibahan sa tanan nga oras. Indi nana igbaylo maskin sa anong manggad ro anang pa-boritong amigo. /MP