Sugilanon Ni Tita Linda

Ni Tita Linda Belayro

Itlog It Condor

Para sa mga mailaon it mga hayupan, ro pispis nga Condor hay kapamilya it agila. Mabahoe ra eawas ag mataas man mag eopad. Kon maila ro agila, ro Condor hay mahugop ta sa tawo rondayang pispis. Idto naga itlog sa mata-as nga bukid ag bihira nga adtunan it tawo. 

Si Clark hay isaea sa mga binatilyo. Unga si Clark it Siyentistang Amerikano. Duro ro anang mga pangutana nga bu-ot madiskubre. Malipay si Clark sa pagsaka sa mga mataas nga bukid nga puro dalipi idto sa Arizona, Estados Unidos.

Isaeang adlaw, nagtukad si Clark sa bukid. Samtang idto imaw sa ibabaw it bukid, naka bati imaw it pagaspas it hangin. Nanago imaw sa likod it bato. Anang guin tan-aw ro palibot. Hakita nana nga ro nanay nga Condor nga naga eom-eom sa anang itlog sa anang guina bantayan nga pugad hasta eompad ro pispis. Paghalin it pispis, guin bo-oe nana ro sambilog nga itlog ag guin uli sa andang baeay. 

Pag abot sa anda, guin pakita nana ro itlog sa anang ama. Guin paboto nanda ro itlog paagi sa “incubator”. Pagka buto, guin butang ro totognon sa isaeang ka hawla.

Tumaliwan ro mga inadlaw, abo ro mga unga nga nawili sa pispis. Nangin popular ro ama ni Clark. Ogaling may habatian sanda nga sugid nga abo nga mga lugar nga guin pang samad it isaeang ka mabahoe nga pispis. Nakaabot sa lugar nanday Clark ro Condor. Guina usoy gali ko nanay nga Condor ro anang totognon ag idto nana nakita sa lugar ni Clark. Guin pang samad nana ro laboratoryo ko anang ama. Abo nga mga tawo ro nadaeasa. Tongod ko mga nagkaeasamad, bu-ot barilon ko mga pulis ro pispis. 

Nagpatunga si Clark ag guina para ro pagbaril sa pispis. Guin buksan nana ro hawla ag guin buhian ro pispis. Nagdaeagan ro pispis sa anang ina. Guin dagit nana ro anang totognon ag mag eopad. 

Halin kato, nakatanum sa paino-ino ni Clark ro isaeang ka leksyon. Pispis man hay may guina huptan nga paghigugma sa anang mga unga. Haum imaw nga isugae ro anan kabuhi, mabawi eamang ro anang unga. /MP