Ni Tita Linda Belayro
Sawa Sa Eaging Simbahan
May sangka mag asawa. Tongod sa andang kahugod, mayad nga paghupot it kwarta, nag manggaranon. Ag tongod sa owa sanda it onga, owa man it maga panubli sa andang hinugdan ag tinipon. Duro ro nakasayod nga abo it manggad ro mag asawa. Isaea eon nga nahatu-on ro mga istambay una sa andang lugar.
Ko isaeang gabi-e ngaron, guin plano ko mag asawa, nagkasugot sanda nga daehon sa eaging simbahan ag idto tagu-on ro kahon sa idaeom it altar. Nag adto sanda, nagkutkot sanda, ag guin eobong ro maisot nga kahon nga puno it alahas ag kwarta. Nag uli man dayon sanda pagkatapos. Ogaling pag abot sa andang baeay, naabtan pa nanda ro mga tawo nga nag pang ukay ko andang aparador ogaling owa man sanda it hakita nga manggad. Sa andang kaakig, guin patay nanda ro mag asawa ag guin sunog pa ro baeay. Owa it nakasayod kon sin-o ro nagpatay ag nagsunog sa baeay tongod tongang gabie, uwa’t naga baraw-baraw nga tawo.
Tumaliwan ro mga dinag-on, owa eon it binate hanungod sa manggad. Nag bag-o eon man ro kura paruko sa rondaya nga simbahan.
May kabulig nga sacristan ro kura, sangka mahugod ag mabuot nga tawo sa parokya. Si Jose ra ngaean ogaling guina pintasan imaw ko anang ama kon owa it kwarta nga ita-o agod ibakae it aeak.
Tongod sa kapintas ko anang ama, hapilitan nga magpataliwan it gabi-i sa simbahan si Jose. Ko isaeang gabi-e ngaron, tag naga pahuway-huway imaw, may hakita imaw nga sawang puti. Mingko may paino-ino ro sawa nga anang guina pay-pay pa adto sa idaeum it altar si Jose. Nagpati si Jose. Nagtuman imaw sa sawa . Guin kutkot nana ro eapok sa guin eobngan it kahon. Hakita nana ro kahon. Guin bo-oe nana ro katunga it manggad ag pumanaw sa ibang lugar. Abo eon ra hibakae, may kwarta eon.
Idto nagbaylo ro anang istilo sa kabuhi. Nangin hueag mang-garanon imaw nga negosyante. Owa mabuhaye, sa kahidlaw sa anang ina, nag uli imaw. Nasayran nana nga patay eon ro anang ama tongod sa masakit. Nagbisita imaw sa andang kura paruko ag guin sugid nana ro tanan. Guin kutkot nanda ro manggad nga habilin ag guin bulig sa mga pobre. Kon siin man ratong sawa, owa it nakasayod. /MP
No comments:
Post a Comment