Sugilanon Ni Tita Linda

Ni Tita Linda Belayro

Guinhalinan It Mga Amazona

Sa kagueangan it Amazon, may mga tribu nga guina patay o guina tapok eang ro mga bag-ong tawo nga eapsag kon masakiton ag babaye. Ro guina pili nanda hay mga eaeaki nga guina himo nga hangaway ko tribu ni Haring Tiglor.

Ka’t nagadaea (nabdos) paeang si Alana, nagpanaw sanda ko anang asawa sa kagueangan agod idto mag unga. Owa it nakasayod nga nag unga it babaye si Alana. Tongod sa kagu-eangan sanda nagtiner. Idto nagbahoe si Salina sa kagueangan. Guin tun-an imaw ko anang ama it mga naga kaeain-eain nga sahi it pakig-away. Guin tun-an imaw it pag usar it eain-eain man nga sahi it mga hinangiban.

Owa magbuhay, nag balik sanda sa kaharian it Tiglor. Nagbahoe si Salina nga maisog. Tongod may itsura o gwapa, abo kana nga naga dayaw. Dugang pa, owa sa anang bu-ot ro pag asawa. Nangin idolo it mga kababayen-an ag mga nanay si Salina. Bu-ot nanda nga mangin kapareho ni Salina ro andang mga unga nga babaye.

Nag abot ro tiyempo nga may taga ibang tribu nga bu-ot eopigon ag sakupon ro tribu ni Haring Tiglor. Sumukoe ro mga soldado, ogaling abong nag kaeamatay busa napirde sanda. Abo nga nailo sa ama nga mga pamilya. Pagkasayod ko ibang tribu nga napirde ro tribu ni Haring Tiglor, nagpaninguha man ro iba nga eopigon man ro tribung nagdaog kay Haring Tiglor.

Sa hamtong nga edad nga dese-otsong dag-on, indi magsugot si Salina nga magdugang ro mga nailo sa ama. Nag adto imaw kay Haring Tiglor agod sanda nga mga babaye ro mag atubang. Guin hibaygan sanda it Hari, ogaling guin tuman ni Salina ro anang bu-ot. Guin tipon nana ro anang mga hangaway nga kababayen-an.

Andang guin sukob ro kontra. Haeopig nanda ro mga kontra ag abo sandang hatipon nga mga armas sa inaway. Halin kato, guin kilaea ro kaisog ni Salina. Owa eon it nag paninguha nga sakupon ro kaharian ni Haring Tiglor. Sa tunga it kagueangan, guintukod ni Salina ro anang kaugalingon nga tribu ag guin tawag sanda nga mga Amazona. /MP