Tita Linda Belayro
Si Entong Ag Ro Nakapresong Prinsesa
Abo ro alilang hayop si Entong. Ogaling mga pispis ro anang paborito. Ko isaeang gabi-e ngaron, may nagtugpa nga isaeang ka pispis. May anang higot sa anang kamaeos. Sa punta it higot, may naka tabid nga tinabas nga may nakasueat nga mensahe. Guin basa ni Entong ro nakasueat: “Tabangi ako. Nakapreso ako sa ikapitong bukid”. Nakasueat sa dugo ro mga letra.
Bu-ot buligan ni Entong ro naga pabulig nga pispis. Ogaling siin imaw masakay? Samtang naga kino it ihapon si Entong, nagpaeapit kana ro pispis. Maangan-angan, nagbahoe ro eawas ag nag bukead ro mabahoe nga pakpak.
Owa mag uyang it oras si Entong. Eagi-eagi, sumakay imaw sa pispis. Dayon eompad ro pispis paadto sa ika pitong bukid. Parabil sanda nakaabot sa ika pitong bukid, nag eopok ro bulkan ag naga buga it lava. Dayon nagbuga it mga batong naga baga-baga. Maabtik man ro pispis sa paglinikaw. Idto sanda nag agi sa maeayo sa bulkan. Owa eang kapilahi, naka-abot sanda sa ika pitong bukid. Nagtugpa sanda. Guin tusikan ko pispis ro higot it poetahan.
May higante gali ro sueod it kwarto. Pagbuka it poeta, nahabugtaw ro higante. Nakasakay eon ro prinsesa ag si Entong sa pispis. Ogaling guin eagas sanda it higante. Madali eon lang sanda maabot it higante. Puma ibabaw ro pispis sa likod it mga gae-om, busa nag uean it mabaskog ag nagbaha tongod mabaskog rong sueog, nadanlog ro higante sa mga bato. Tumumba imaw ag tumama ro anang oeo sa bato, dayon namatay.
Nakaabot sa kaharian ro prinsesa. Nagbaylo ro dagway it pispis. Tawo man gali imaw, isaeang ka prinsipe.
May umaging magueang. Guin taw-an si Entong it panyo ko magueang nga naga pakalimos agod mabuligan ro prinsesa nga anang igmanghod nga guin preso it higante.
Bilang pasaeamat, guin pakasae si Entong sa prinsesa. Nagbisita imaw sa anda ag nangin malipayon ro anang pamilya. /MP
No comments:
Post a Comment