Sugilanon Ni Tita Linda

Ni Tita Linda Belayro

Rosa Mystica

Masubo ro mga tawo sa kaharian ni Haring Alfonso. Ro andang mabuot nga hari hay dinapuan it isaeang ka masakit nga indi matugma it mga manog bueong sa kaharian. Bangud sa kabuot ko hari, may nag presentar nga isaeang ka magueang sa palasyo nga magturo it bueong sa hari agud magmayad. Suno kana, isaeang ka bueak nga Rosas nga idto eang naga tubo sa ika pitong bukid halin sa gin harian ro maka pamayad sa hari.
Kinahangean nga putli ro tagipusuon ko maga usoy sa bueak ngara. Ha-um man nanang ihaead ro anang kabuhi para sa hari.
Nagtililipon ro tatlong mga prinsipe nga sanday Ramir, Vener ag Arnel kaibahan ko mahae nga Reyna. Tongod palangga gid nanda ro andang amang hari, unang nag presentar si Ramir agud mag usoy ko Rosas nga bueak. Guin paha-uman imaw it sadyaan nga pagkaon ag aeak parabil imaw magpanaw. Pag-abot nana sa daeanon, nakasubeang imaw it magueang nga manog pakalimos. Nangayo imaw it pagkaon sa prinsipe. Guin balibaran imaw ni Prinsipe Ramir tungod basi kuno gutomun imaw kon ita-o sa iba ro anang pagkaon. Masubo ro magueang. Guin kumpas nana ro anang baston ag nangin bato si Prinsipe Ramir.
Pilang adlaw eon ro nagtaliwan, owa pa makabalik si Prinsipe Ramir. Bangud owa nakauli si Prinsipe Ramir, sumunod ag guin apas imaw ni Prinsipe Vener. Imaw man ro natabo kana. Ngani si Prinsipe Arnel ro katapusan nga nagpanaw. Pag-abot nana sa daeanon, nagpakita eon man kana ro magueang. Tongod sa kagutom, natumba ro magueang. Guin pakaon imaw ni Prinsipe Arnel. Pagka-tapos nga nauli-an it kusog ro magueang, guin taw-an nana si Prinsipe Arnel it panyo. “May taga bulag rayang panyo ag maga serbi nga saeakyan”, bilin pa ko magueang.
Nagpanaw ro ma-gueang. Nagpadayon man si Prinsipe Arnel sa anang pag eakbay. Pag-abot nana sa unang bukid, may naga hueat gali kana nga gutom eon nga leon. Guin wasiwas nana ro panyo busa owa imaw makita it leon. Guin gamit man nana nga magic carpet ro panyo agud maka eopad. Idto tumugpa sa ikatlong bukid. Idto eon man ro mas mabahoe pa nga leon nga haum man tumueon it bilog nga tawo. Guin wasiwas eon man ni Prinsipe Arnel ro panyo ag owa man gihapon imaw makita it leon. Sumakay eon man imaw sa panyo ag naka-abot eon imaw sa ika pitong bukid. Sa anang pag tangda hakita nana ro Rosas nga naga banaag sa kahayag. Anang guin saka ag dali-dali nga guin gamit ro panyo agud madasig ro pag–uli sa palasyo.
Pag–abot sa palasyo, guin eâ -gâ ro Rosa Mystica. Guin painom dayon sa hari. Ratong habilin hay guin daea ni Prinsipe Arnel agod ipaligos sa eawas nga nangin bato ko daywang ka prinsipe. Nagmayad ro eawas ko hari. Nakabalik man ro kabuhi ko daywang ka prinsipe. Malipayon ro bilog nga kaharian. Nagbalik eon man ro kapagsik it hari ag guin taeopangud eon man ro mga problema it mga tawo sa guin harian. /MP