Sugilanon Ni Tita Linda

Ro Ayam, Ro Kuring Ag Si Amar

Parabil mamatay ro anang ina, guin sugo si Amar nga bawi-on ro anting-anting nga guin pahueam ko anang ina sa anang maninay. Pagka-eobong ko patay nga eawas ko anang ina, nagpanaw eon si Amar. Pag-abot nana sa baeay ko anang maninay, mabuhay eon gali nga naga masakit man ro anang maninay. Suno sa manog bueong, maga mayad eamang imaw kon ikabalik sa tag-anan ro anting-anting. Busa guin uli. Pagkabaton ni Amar, nagmayad dayon rong anang maninay.
Nagbalik si Amar sa andang baeay. Nangayo imaw sa anting-anting nga rubi it mabahoe nga baeay, mga igdaeapat, pagkaon ag mga eambong. Sa doyong kaharian, may onga nga prinsesa ro andang hari. Bu-ot nga pakasaean ni Amar ro prinsesa. Ogaling indi magsugot ro hari kon indi imaw pagpatindugan it mabahoe pa gid nga palasyo. Paagi sa rubi, nagpatindug it mas mabahoe nga palasyo si Amar nga human sa bueawan ag pilak. Hakibot ro hari sa anang pagbugtaw ko agahon tongod may nagatindug eon nga mas mabahoe pa nga palasyo ko sa anang palasyo.
Nag asawa si Amar ag prinsesa. May andang daywang ka alila nga kuring ag ayam. Isaeang adlaw, nagpanaw si Prinsipe amar agud mangayam. Haaywan ro anang asawa sa andang baeay. May hakita imaw nga babayeng magueang nga nagatangis sa prente ko eobong ko anang onga. Pagkakita ni Amar, guin daea nana ro magueang sa andang baeay agod una paestahon. Nag-sunod ro magueang.
Raya gali nga magueang hay isaeang ka bruha ag bu-ot bue-on ro anting-anting ni amar. Sa pagpanaw it pangaywa ni Amar agod mangayam, nabilin ro bruha ag ro prinsesa. Guin pilit ko bruha nga boe-on ro rubi. Nagpamalibad ro asawa ogaling guin gamitan imaw it hokus-pokus ag habo-oe guid nana ro anting-anting. Guin pangayo ko bruha sa anting-anting nga duea-on ro palasyo ag asawa ni Amar. Patueogon man si Amar sa anang pag pangayam. Pagbugtaw ni Amar, owa eon ro rubi. Kon siin-siin sanda naka-abot sa pag inosoy hasta guin ga-oy si Amar. Nagpahuway anay imaw samtang padayon sa pag-usoy ko kuring ag ayam.
Naka abot ro kuring ag ayam sa isaeang ka uengga it mga eanggam nga siin guina hiwat ro kasae ko prinsesang eanggam. Guin kidnap nanda ro prinsesa ogaling ibalik imaw kon usoyon, hikita ag ikabalik ro anting-anting. Linibong eanggam ro nag inusoy hasta ro isaeang ka paki nga eanggam ro naka-abot sa guina estaran it bruha. Hakita nana nga guina um-um it bruha ro bato samtang naga katoeog. Binudburan ko eanggam ro anang ikog it pulbos ag pinitik nana sa ilong it bruha. Nag baha-on (hatsing) ro bruha. Bangud kara, nahamilak ro rubi. Madasig nga inangkit ko paki nga eanggam ro rubi, umuli imaw ag guin ta-o it uman sa kuring ag ayam. Guin balik kay Amar do rubi, ag guin padayon ro kasae ko prinsesang eanggam. Pagkabaton ni Amar ko rubi, guin pangayo nana ro anang asawa ag palasyo. Guin padakup dayon nana ro bruha. Guin papili imaw kon ano kana ro silot. Higot o kabayo. Guin pili nana ro kabayo. Guin gapos imaw ag itabid sa ikog it kabayo. Guin hampak dayon do kabayo. Seging dinaeagan ko kabayo nga guina guyod ro bruha hasta namatay. /MP