Sunday, January 20, 2008

Sugilanon Ni Tita Linda

Ni Tita Linda Belayro

Onga It Karpintero
Katong tyempo, may isaeang ka pobreng binatilyo. Alin ro anang pangaean ag kaibahan nana nga naga kabuhi ro anang mahugod nga ina. Ilo eon imaw sa ama.
Isaeang adlaw, nagka kwarta ro anang ina halin sa kabakeanan ko guin baligya nana nga tigib ag eagari ko anang tumaliwang asawang karpintero.
“Toto, mabahoe ka eon, mag adto ka sa banwa agod usoyon mo ro imong swerte. Hayra ro kwarta agod imong umpisahan sa pag negosyo.”
Nagpanaw si Alin. Pag–abot sa isaeang ka bazaar, hakita nana ro isaeang ka eaeaki nga may kuring. Guin enkaminar nga bak-eon nana ro kuring. Nag sugot ro eaeaki, guin bayaran ag guin uli sa anda. Naakig ro anang ina pagkasayod ko deal ni Alin. Ogaling tongod palangga nana ro anang onga, guin taw-an eon man nana it kwarta nga kabakeanan ko sapatos ko anang ama.
Nag-adto eon man si Alin sa banwa. Pag-abot, hakita nana ro isaeang ka tawo nga may ayam. Binakae eon man nana it ayam tanan ro anang kwarta ag guin uli ro ayam sa andang baeay. Owa eon man it nahimo ro anang ina. Busa, sa katapusan nga kuartang kabakeanan ko andang eaging alpombra, guin tao eon man kay Alin. Nag panaw si Alin, pag-abot sa tindahan, may hakita imaw nga sawa nga may koronang naga barlak. Guin bakae nana ro sawa sa tag ana ag guin uli sa anda.
“Nano ka nga onga ka? Owa ka guid naga gamit ko imong oeo. Ham-an it mga sawa ro imong guin uyangan it kwarta? Mayad pa ngani ro kuring, naga kaon it eanggam ag ro ayam pwedeng maka bantay it baeay. Ro sawa, basi sabon kon tuk-on ka. Patyon mo eagi ron!” hambae nga akig eon ro anang ina.
Ka’t guina pusdak eon konta ni Alin ro bato sa oeo it sawa, nagpakitlo-oy ro sawa nga indi pag patyon. Imaw kuno hay onga it Haring Sawa. Nag sugot si Alin. Guin daea nana ro sawa sa andang palasyo. Samtang sa daeanon sanda, guin bilinan imaw ko sawa nga pangayu-on sa anang ama nga regalo hay ro batong ruby nga guina um-um ko Haring sawa. Kon ano ro anang bu-ot pangayu-on sa ruby hay iga-tao kana.
Pag-abot sa palasyo, nalipay ro Haring Sawa bangud naka balik ro anang onga. Guin pangutana si Alin kon anong regalo ro anang gusto. Guin pangayo nana ro ruby.
Ko una, indi kunta ita-o ko hari ro bato ogaling naghinyo ro onga nga sawa sa anang ama, ngani, guin ta-o lang kana. Nag-uli eon si Alin. Pag-abot sa baeay, nangayo imaw it pagkaon tongod mabuhay eon nga owa sanda nakasamit it manamit nga pagkaon. Nangayo imaw it mga eambong ag mabahoe nga baeay nga kumpleto sa kagamitan. Natuman tanan ro pangayo ni Alin.
Sa royong kaharian may onga nga prinsesa ro andang hari. Naila si Alin sa prinsesa. Bu–ot nanang pakaslan ogaling indi magsugot ro hari kon indi imaw pagtaw-an it mas mabahoe ng palasyo. Umuli si Alin sa andang baeay. Guin pangayo nana sa ruby ro palasyo. Pagkaaga, hakibot ro hari nga sa tupad ko anang palasyo, may naga tindog nga mas mabahoe pang palasyo, nga nahuman sa bueawan ag pilak. Nagpakasae ro prinsesa ag si Alin. Nagkabuhi sanda kaibahan ko anang ina ag daywang ka alilang ayam ag kuring. /MP

No comments: