By Palmi L. Isturis
Natapos eon ro tatlong adlaw nga Medical-Surgical Mission nga ginpatigayon sa Dr. Rafael S. Tumbokon Memorial Hospital (DRSTMH) ko February 11-13, 2008. Sa inisyatibo ni Gov. Carlito S. Marquez, nangin possibli ro nasambit nga aktibidad nga ginpangunahan it Serge Bongabong Dioso Foundation ag Philippine Nurses Association of Michigan.
Nangin masako ro operating room it ospital bangud sa sari-saring surgical operations nga ginpatigayon kapareho it thyroid (goiter), cholecystectomy (bato sa apdo), ag hernia/hemorrhoids (luslos) para sa major operations. Maabo man ro ginpa-idaeum sa minor operations.
Mag euwas kara, ro gina hueat-hueat nga Cataract Mission hay nakaserbisyo man sa mga pumueuyong may masakit sa mata o may katarata. Dugang pa, may ginpatigayon man nga Medical and Pediatrics Consultation kun siin nakabaton it libreng bueong ro mga nagpakonsulta eabi gid ro mga unga. Sa kabilugan, ro ginbilog nga Surgical-Medical-Cataract Mission hay nakaserbisyo sa 359 ka mga pasyente:
Major Operation–20, Minor Operation–38, Cataract Operation–49, Cataract Consultation–80, ag Medical/Pediatrics Consultation–172 pasyente.
Libre ro nasambit nga mga operasyon ag konsultasyon busa maabong mga pumu-eoyo ro nakapa-dipueos sa sari-saring serbisyo nga ginhatud it mga masunod nga sponsors: Serge Bongabong Dioso Foundation, Philippine Nurses Association of Michigan, Eye Surgeons from St. Luke’s Medical Center, Philippine Nurses Association–Aklan Chapter, ag Aklan Provincial Government. /MP
No comments:
Post a Comment