Kalibo News

PAF Reservists, Dugangan It 25 Ka Tawo Sa UADT

by Terence Toriano

Magadugang it 25 nga trainees ro anay dati nga 50 nga myembro it Philippine Air Force Reservists, Aklan Chapter nga maga pa-idaeom sa unit Active Duty Training Batch 2, kung sa siin nakataeana sa buean it Pebrero, anyu dos mil nueve sa sueod it trenta ka dominggo.

Ginapaabot sa tanan nga mga nakatapos it Philippine Air Force Reserve Officer Training Corps, kapin ro mga estudyante it Garcia College of Technology, Javtes ag Verde Grande nga naka agi it Air Force ROTC. Kamo ro mga kwalipikado nga magpasakop ag mahimo ninyo nga adtonan ro eskwelahan it JAVTES o makipag angot kay Leonardo Billones, military instructor it Philippine Air Force ROTC/WATC cadets and cadettes o kay Marites Apolonio, sek-retarya it Philippine Air Force Reservists Asso-ciation – Aklan Chapter, para sa pag palista ag pag pasakop sa nasambit nga pag hanas.

May libre nga daywang klase nga uniform, ro battle dress attire ag government office uniform, kaibahan man ro daywang klase it sapatos, ro combat shoes ag charcoal office shoe uniform daea man ro allowance nga pagabatonon sa durasyon it pag hanas kun siin ginahimo eamang ra kada weekend.

Ro pagbukas ag pormal nga pagbaton hay pagahimu-on sa sueod it rondayang buean it Pebrero. Ro mangin dinapit nga bisita hay ro Commanding General it 5th Air Reserve Center nga naka base sa Mactan Benito Ebuen Air Base sa Lapu-Lapu City sa probinsya it Cebu.

Laye Sa Trapiko Hugot Nga Igapatuman Sa Kalibo

Hugot nga igapatuman ro ‘No Helmet and No Travel Policy’ sa mga motorista nga nagamaneho it motorsiklo sa banwa it Kalibo. Rondaya ro ginapaabot it chief it traffic section it Kalibo Police Station nga si Benny Jones Mendoza.

Nakabase ro nasambit nga kasuguan sa nasyonal nga laye kamana man ko mga numero it traffic accidents kun siin ro kaabu-an nga owa naga suksok it helmet hay naga kaeamatay.

Dugang pa gihapon ni Mendoza, ro local nga gobyerno ag Kalibo Police Station hay padayon nga nagapadumdom sa tanan nga mga motorista nga indi eon magmaneho kung nakainom it makahieilong nga ilimnon. Magpahatod eon lang tongod kaabuan man gihapon nga na-aksidente hay ro mga naka-inom.

Ginapanawagan man ni Mayor Raymar A. Rebaldo sa pumoeoyong Kalibonhon nga mag-bueoligan ro tanan ag sundon eang ro mga sueondanan it trapiko. Kun may mapan-uhan nga mga empleyado it gobyerno mapa-nasyonal o lokal nga ahensya kaeakip eon ro mga kapulisan nga naga maneho it motor nga owa it helmet o naga eabag sa trapiko, tumawag eamang kamo sa Kalibo Police Station sa numerong 166.

Mga Tricycle Drivers Ag Operators, Mag Bu-oe
It Inyong Body Numbers

Ginapaabot it taeatapan it Business Permits and Licensing Division (BPLD) it Munisipyo it Kalibo sa mga tricycle drivers, operators, ag sa naga panag-iya it mga tricycle nga owa pa naka buoe it andang tricycle body numbers nga m ag adto eon sa one-stop-shop daea ro mga masunod nga mga papeles: Ro andang prangkisa, list of registration ag opisyal nga resibo nga halin sa Land Transportation Office (LTO).

Suno sa hepe it BPLD nga si Haidy Concepcion, kinahangean gid nga magbuoe eon it body numbers ro mga drivers, operators it mga tricycles para malikawan ro penalidad o pag dina-eakpan bago umabot ro deadline nga naka-taeana sa petsa beynte it buean it Pebrero, anyo dos mil nwebe.
Sa makaron hay segidas sa gihapon ro pag-issue it matrix ag tricycle Mayor’s permit para sa mga nagabuoe o naga pa renew it mga tricycle body numbers.

Dugang pa nga ginapaabot ni Concepcion hay para sa mga negos-yante o tag-ana it mga negosyo sa banwa it Kalibo nga owa pa naka pa-renew o naka buoe it mga business permits, kung sa siin sa kapareho man nga petsa beynte it Pebrero makaron nga dag-on nakataeana nga deadline. /MP