Sugilanon Ni Tita Linda

Ni Tita Linda Belayro

Baeangaw

Mabuhay eon nga owa it tunay nga hari ro kaharian it Usbek. Hapatay si Haring Kiya nga owa it nagpanubli ko anang trono bangod owa man imaw it onga nga eaeaki. Sa kaharian it Usbek abi hay kinahangean nga onga nga eaeaki ro maga panubli it korona nga kadugo it hari. Busa, ro punong ministro ro naga dumaea ogaling bukon it kapares kay Haring Kiya.

Matamad rayang ministro. Owa guid naga libot sa kaharian agod usisaon ro problema it mga tawo. Kon may gyera, guina pabay-an nana ro anang mga soldado sa anang kumander. Kon may bisita man ro palasyo, ro anang sekretaryo ro naga atubang. Ro anang obra, mag-inom, magkinaon, ag magkatoeog.

Nag-abot ro tagmaea-ea ag abong tanum ag kasapatan ro nag-kaeamatay. Abo man nga mga tawo ro guin gutom busa hapilitan nga magsukob ro mga tawo sa palasyo ogaling guin punggan sanda it mga bantay it hari ag ro iba guin pamatay.

May manog pakalimos. Tongod sa kagutom hay nagpilit nga magpangayo sa palasyo. Guin tabog imaw it gwardya ag guin sampae pa. Sa kaakig ko magueang, guin kumpas nana ro anang baston ag guin sumpa nga kutob tanan nga pagkaon sa palasyo hay paga oeoron. Naduea dayon ro magueang. Kat naga kaon eon ro mga tawo sa palasyo. Hakita nanda nga puro ueod ro kan-on pati ro mga de lata.

Guin pamilak nanda ro pagkaon nga guin sinaeap man it mga tawo. Ogaling puro malimpyo man tanan pag-abot kanda. Imaw nga imaw ro obra it mga tawo ro maghueat ko guina haboy nga pagkaon ag alisto man sanda nga naga bantay. Nagtaliwan ro tigugutom. Nagpabando ro hari sa mga tawo nga daehan imaw nanda it pagkaon sa palasyo. Ogaling owa kana it nagtuman. Sa anang kaakig, inatake imaw sa tagipusuon ag namatay.

Golpe nga may nagtunga nga baeangaw. Mabuhay eon nanda nga guina hueat rayang baeangaw. Suno sa isaeang ka propeta, raya ro sabat sa andang pangamuyo. May isaeang ka binatilyo nga nag-abot kaibahan ro isaeang ka monghe. Imaw gali hay onga it hari sa isaeang ka dama ag idto nana guintago sa monasteryo.

Pag-abot sa edad nga 16, guindaea imaw sa kaharian agod ipakilaea ag kadungan ro pagtunga it baeangaw. Naghugyaw ro mga tawo tongod may anda eon nga tunay nga hari halin sa dugo ni Haring Kiya. Guin pamunuan ni haring Yuri ro kaharian it Usbek sa bulig it monghe. Kat matukod eon ro kaharian, nagbalik ro monghe sa monasteryo ogaling naga pangayo it solusyon ro hari idto sa monasteryo kon imaw may problema. /MP