Sugilanon Ni Tita Linda

Tita Linda Belayro

Bernardo Carpio

May isaeang ka higante nga mabuhay eon nga guina handum sa sangka lugar. Handum gid nandang patyon ko mga tawo tongod imaw eon lang ro nakaubos ko andang kahayupan. May kapintas pa rayang higante ay kon owa sanda it ipakaon kana hay guina wasak nana ro baeay ag mga pagkabutang ko mga tawo. Agod mamatay, gin samitan nanda nga pakan-on it hilo o hueogan it bomba. Owa guid nanda mapatay tongod ro ana kara nga pag ginhawa hay una sa isaeang ka bukid nga bato nga naga kipo-kipo kon imaw mag ginhawa. Kon hin-uno ag kon sin-o kana ro makapatay hay guina pa sa Diyos eon lang nanda.

Ko isaeang agahon, may isaeang ka magueang nga nagpangayo it pagkaon sa isaeang ka bakero. Si Bernardo Carpio hay manog bantay it mga hayop. Guina suhuean ra imaw para magbantay it mga hayupan. Hasubeang nana ro magueang nga nangayo kana it pagkaon. Guin tao nana ro anang baeon pati ro tubi. Nagkaon dayon ro magueang. Pagkatapos it kaon, guin taw-an nana si Bernardo it bato nga itom. Suno sa magueang, raya kuno ro ga tao kana it pwersa agod punggan ro pagkipo-kipo it daywang ka bato, ag makita ra sa itom nga bukid. Si Bernardo Carpio ro taga salar sa mga tawo kontra sa higante.

Guinbaton ni Bernardo ro bato ag guin aywan sa magueang ro anang mga hayopan nga guina alilaan. Pag-abot nana sa itom nga bato, hakita ni Bernardo sa idaeum ro naga buka-buka nga bato. Nanaog imaw paagi sa baeagon ag dayon guin om-om ro bato. Sumueod imaw sa naga buka-buka nga bato ag guin punggan ro pagkipo ko bato miyentras may anang kusug samtang ro higante hay parang naga kaupos nga kandila nga indi kaginhawa. Ka’t mabatyagan ni Bernardo nga owa eon it pwersa ro higante, nag-adto imaw sa baeay it higante ag idto hakita nana nga naga tingha eon lang ro higante.

Guin pangayo nana ro kakapid nga bato. Indi kunta igta-o it higante ogaling hay owa eon imaw it mahimo. "Agod mabuhi ka, sundon mo rang sugo", hambae ni Bernardo sa higante. Tapuson mo eon ro pag halit sa mga tawo. Nag promisa imaw nga indi eon imaw maghalit sa mga tawo kundi mabulig pa. Halin kato, si Bernardo Carpio eon ro amo ko higante ag guina tuman nana ro tanan nga sugo ni Bernardo Carpio. /MP