Sugilanon Ni Tita Linda

Ni Tita Linda Belayro

Paghigugma It Isaeang Ka Ina

Pebrero 14 eon man. Adlaw it mga tagipusuon. Kon adlaw it mga tagipusuon, ham-an it kaabuan nga naga selebrar hay magnobyohanan? Indi baea tanan hay may tagipusuon? Ag kon may tagipusuon hay segurado nga naga higugma?

Ogaling mas may eabaw pa baea sa paghigugma it isaeang ka ina sa onga kon paghigugma ro paga hambaean?

Baeo eon si Meding ag naga kabuhi sanda ko anang solong onga nga si Merto. Palangga gid ni Meding ro anang onga. Ngani tanan ro anang gina pangayo hay ginatao gid nana. Nagbinata eon si Merto. Sa anda ngaron nga lugar hay may pinaka gwapa nga daeaga.

Tongod sa ka gwapa ni Lorna, abo nga mga kaeaeakihan una sa andang lugar ag pati pa sa pihak nga baryo ro naga pamasyar kana. Isaea eon kanda si Merto. Mga manggaran ag may tindog ro anang karibal, ogaling sige mat-a gihapon nga pamasyar ni Merto sa baeay ko daeaga. Nasum-oe eon si Lorna sa pag inatubang sa binata. Nabatyagan gid nga owa naila-i ni Lorna si Merto.

Busa, agod mapundo eon ro pag inadto ni Merto sa andang baeay, guintaw-an imaw ni Lorna it isaeang ka imposibleng oeobrahon.

"Kon madaea mo ro tagipusuon ko imong ina nga naka putos sa puti nga panyo, but-on ko ikaw", ritar kana ni Lorna. Ko hapon ngaron, masubo gid nga mayad si Merto. Hakita imaw ko anang ina.

"Ham-an it masubo ka Toto?" pangutana nga may pagkabaeaka ko anang ina.

"Hambae abi ni Lorna hay but-on kuno nana ako kon madaea ko ro tagipusuon ko akong ina", masubong sabat ni Merto.

"Tumana Toto, kon imaw ro maka palipay kimo", paniguro ni Meding. Guin tuman ni Merto ro sugo ni Meding. Guin putos nana it puting panyo ro tagipusuon ag dali-dali nana nga gin daea sa daeaga. Sa anang pagdinaeagan, nasandad imaw sa pilapil ag nabuhian nana ro tagipusuon.
"Bangon Toto, ag magpadayon", hambae it tagipusuon. Nagpadayon si Merto hasta naka-abot imaw sa baeay it daeaga. Pagkakita ko daeaga ko tagipusuon, nadismayo imaw. Owa imaw naga hunahuna nga tumanon ni Merto ro anang hinangae nga sugo. Owa masayuri kon nagdayon sanda ni Merto. Ogaling sigurado nga guin haead ni Meding ro anang kabuhi para sa kalipayan ko anang onga.

Mas may eabaw pa baea sa paghigugma it isaeang ka ina sa anang onga? /MP