Ni Tita Linda Belayro
La Roca Engkantada
Sa banda it Maldives Island, may isaeang ka Isla nga guina likawan ko mga barko. Isaeang ka isla nga guin sumpa. Abo nga kabuhi ro nagkaeaduea tongod tanan ro mga naga-aging barko hay naga kaeonod. Siin maghalin ro sumpa ko rayang Isla?
Si Don Camino hay isaeang ka manggaranon nga negosyante. May dogalingon imaw nga barko ag kumpleto man sa mga tripulante. May anang bata-on nga asawa, si Donya Inez. Tongod gwapa ag bata pa, guin daea-daea nana maskin siin imaw naga byahe. Maeapit ag mabuot sa mga tripulante si Donya Inez. Nakipag estorya imaw kanda, isaea eon si Umberto. Isaeang adlaw, samtang naga estorya sanda ni Umberto sa may barandilya it barko, hakita sanda ni Don Camino. Nagselos it duro ro Don. Busa, sa unang isla nga andang hakita, guinpa dungka nana ro barko ag guin papanaog ro daywa.
Guin hun-an man nana ro mga tripulante nga indi pagtaw-an it pagkaon ro daywa. Ogaling tongod sa kabuot kanda it Donya, may nagpilak it kahon nga may mga de latas ag gamit nga owa naka sayod si Don Camino.
Nagpanaw ro barko ag haaywan ro daywa. Ko primero hay may guin kaon pa sanda, ogaling ko olihi, hay ubos eon ro andang pagkaon. Nag-plano sanda nga maka-takas sa isla paagi sa pag obra it balsa nga may kahoy. Pagka human, nag eayag sanda. Ogaling sa owa it swerte, haagyan sanda it bagyo sa tunga it eawod ag nasamad ro andang baesa. Binalik man guihapon sanda sa isla. Tongod sa kagutom, namatay ro daywa.
Halin kato, ro mga barko nga naga inagi hay guina higop it mabaskog nga lilo ag indi eon makauli. Nag eapta ro balita sa tanan nga mga barko. Busa, maskin maliko ro rota hay naga likaw eon lang sanda.
May isaeang ka kapitan nga maisog. Parabil sanda magpaeapit sa isla, nag obra imaw it salbabida nga puno it bueak, mga prutas ag may sueat. "Mga amigo kami. May pamilya kami nga naga hueat kamon. Pasensyaha kami kon nakatubeag kami sa inyong pagpahuway. Kon mahimo, pa-agya kami. Guin itsa ratong salbabida. Guin higop ratong mga bueak ag pagkaon. Maangan-angan, nagkalma ro tubi. Nagpadayon ro sakayan. Pag-abot sa tunga-tunga, naga paibot-ibot ro tanan. Owa it natabo ag matawhay sanda nga nakataliwan. Naghugyaw ro tanan. Halin kato, kada agi it barko hay naga ea-ong sanda ag naga itsa it maskin ano eon lang. Guin obrahan dayon ko gobierno it parola ro isla agod indi magtaeang ro mga barkong naga-agi. Ko olihi, nangin tourist attraction rayang isla ag naduea eon ro sumpa ko La Roca Engkantada. /MP
1 comment:
It is a great story. Makaron ko paeang ra habatii. Thanks.Isugilanon ko ra sa mga nieces and nephews ko.Permi sandang ga kutana it sugilanon nga native.
By the way taga siin si MARK ANTHONY D. LEYSON ako hay taga Bubog basi pariente ko imaw.hara rang email address weledadelossantos@yahoo.com Thanks
Post a Comment