Kalibo News

by TERENCE TORIANO

Personal Nga Ginbaton Ro Plaque of Appreciation

Personal nga ginbaton ni Kalibo Mayor Raymar A. Rebaldo ro isaeang ka "Plaque of Appreciation" ku Pebrero 16 sa Hyatt Hotel Manila halin sa National Broadcasting Network (NBN) kung siin sa programang "Lakbayin Ang Magandang Pilipinas" hay gin-feature ro banwang Kalibo.

Suno kay Rebaldo, kapin sa 1,500 nga mga LGU’s sa bilog nga Pilipinas ro maid-id nga gin istudyuhan ro mga programa ag proyekto it andang banwa, ro pagsinaeayu it mga pumoeoyo, ro kalinong ag katawhay, ag pag asenso it komyunidad nga nangin basehan nga napili-an ro banwa it Kalibo nga i-feature.

Seminar–Workshop It Civil Service Commission Ginpatigayon Ginpatigayon makaron nga Domingo ro tatlong adlaw nga seminar-workshop nga ginpartisipahan it mga human resource practitioners, administrative officers, human resource manage-ment practitioners ag mga empleyado nga in-charge sa personnel action it mga local nga gobyerno sa probinsya it Akean.

Gintalakay man sa nasambit nga hinun-anon ro mga problema ag solusyon sa mga appointments, mga preparasyon ag iba pa nga mga personnel action sa ika mayad it sangka opisina o taeatapan sa patag it pag empleyo sa gobyerno.

Ro mga partisipantes hay naghalin sa mga nagakasri-sari nga mga ahensya ag munisipyo sa bilog nga provbinsiya it Akean ag kaingod pa gid nga probinsiya.

Gulayan Sa Paaralan It Division of Aklan Nagda-og

Nagpatigayon it programa nga gulayan sa paaralan ro DepEd Aklan sa lima ka distrito: Tangalan, Lezo, Libacao, Madalag ag banwa it Buruanga.
Sanda ra hay gintaw-an it mga busoe halin sa Department of Agriculture Regional office nga ginta-o pinaagi sa Department of Education ku nagtaliwan nga Nobyembre anyo 2008.

Sa ginhiwat nga pa indis–indis, ro distrito it Lezo ro nag da-og kun siin imaw ra ro maga representar sa Division of Aklan sa regional level para sa gulayan sa paaralan.

Padumdum Sa Stakeholders Ag Operators It Tricycle

Gin umpishan eon ko Pebrero 23, 2009 ro pagdakop sa mga tricycle nga owa it body number. Rondaya ro ginpaabot it traffic section it Kalibo Police Station.

Ro mga madakpan nga mga tricycle hay maga multa sa idaeum it traffic code it Banwang Kalibo.

Ginpabutyag it hepe ku traffic section nga si SPO3 Benny Jones Mendoza nga mahaba-haba eon ro mga inadlaw nga gintao sa mga tricycle drivers ag operators nga naga operate sa banwang Kalibo para magbuoe it andang body number. Makaron gina-remind ro tanan nga owa pa it nasambitan nga body number nga mag-adto eon sa one-stop-shop sa business permits and licensing division it banwang Kalibo para maiwasan ro mga surcharges ag iba pang penalidad.

Dugang pa nga impormasyon, gin-paabot ku Business Permits Licensing Division nga may daywang ka kolor ro taripa eabi eon gid sa pag-eukat it matrix. Dati hay pink ro kolor it matrix ogaling, tongod naubusan it kapareho nga papel, green ro bag-o nga kolor it gina isyu nga matrix.

Supply It Bugas, Posibleng Maga Kueang

Posibleng magatuhaw ro problema sa supply it bugas sa probinsya it Akean kun indi eagi matatapan ro maka alarma nga masakit sa mga paeay. Kaabu-an kara hay makit-an nga may bunga ro paeay ogaling kun buk-on ro binato hay owa it sueod nga bugas. Raya ro rason ko pagtipon ku Pebrero 20 ko mga agricultural officers sa idaeum it agrikultura sa pag-usoy it solusyon sa problema.

Suno kay Sharon Luces, agricultural technologist sa idaeum it Municipal Agricultural Services Division it Kalibo, isaea sa mga nakit-an nga rason hay ro mga sahi it paeay nga susceptible sa nagpabaylo-baylong panyempo ag mga sakit sa paeay.

Suno man kay Mayor Raymar A. Rebaldo, maid-id ro pagtutok it banwang Kalibo sa patag it agrikultura tongod sa isyu it seguridad sa pagkaon bukon eang sa mga Kalibonhon kundi sa mga Akeanon bangod ro Kalibo hay sentro it komersyo.

Sa pakikipag angot man kay Emmanuel Soviet Russia Dela Cruz, SB member ag chairman sa committee on agriculture, may ginpatigayon nga meeting ro municipal agriculture and fisheries council ku nagtaliwan nga Pebrero 17 kun siin ro mga mangunguma hay ginpaabot sa mga agricultural technicians ro andang problema.

Ro mga agricultural technicians hay naga-patigayon it pag ebalwar ag pag analisar it mga datus kun siin ro nauna eon nga mga datus hay ginpasar sa opisina it Municipal Agricultural Services Division, dugang pa ni Dela Cruz. /MP